तमान सिङ्ग गुरुङ्ग — भीमदत्त नगरपालिकाको महाकाली तटीय क्षेत्रका बासिन्दाहरू तटबन्ध पुनर्निर्माणमा भएको ढिलाइप्रति आक्रोशित हुँदै सडकमा उत्रिएका छन्। दोधारा चाँदनी जोड्ने चार लेनको महाकाली पुलको तटबन्ध महिनौँदेखि भत्किएको भए पनि पुनर्निर्माणमा चासो नदेखाइएको भन्दै स्थानीयहरूले विरोध प्रदर्शन गरेका हुन्।
गत भदौ महिनामा महाकाली नदीमा आएको बाढीले निर्माणाधीन तटबन्ध भत्काएको थियो। पटक–पटक आग्रह गर्दा पनि पुनर्निर्माण सुरु नभएपछि शनिबार बिहान स्थानीयहरूले आन्दोलन गरेका थिए। प्रदर्शनका क्रममा करिब आधा घण्टा सडक अवरुद्ध भएको थियो भने त्यसपछि पुनः सञ्चालन गरिएको जिल्ला प्रहरी कार्यालय कञ्चनपुरले जनाएको छ।
भीमदत्त नगरपालिका–१३ का वडा अध्यक्ष रामबहादुर बोहरा झक्कासका अनुसार बाढी पीडितहरूको पीडालाई सम्बोधन गर्नुपर्ने आवश्यकता छ। “यो कुनै राजनीतिक आन्दोलन होइन, यो हाम्रो अस्तित्वको लडाइँ हो,” उनले भने। हिमाली क्षेत्रमा हिउँ पग्लिएर आउने बाढीले तटीय क्षेत्रका स्थानीयहरूलाई वर्षेनि जोखिममा पार्ने भएकाले तटबन्ध निर्माणमा ढिलाइ गर्नु निन्दनीय रहेको उनको भनाइ छ।
स्थानीयहरूले यदि आइतबारदेखि पुनर्निर्माण सुरु नभए अझ कडा आन्दोलन गर्ने चेतावनी दिएका छन्। वडा अध्यक्ष बोहराले तत्काल पुनर्निर्माण कार्य अघि नबढे करिब २ हजार परिवार विस्थापित हुने र ठूलो संख्यामा स्थानीयहरू सडकमा उत्रने बताए।
असोजदेखि नै स्थानीयहरूले तटबन्ध पुनर्निर्माणको माग गर्दै आएका छन्, तर हालसम्म सरकारी निकायहरूबाट कुनै ठोस पहल भएको छैन। पुनर्निर्माण कार्यमा चासो नदिइए थप सशक्त संघर्ष गर्ने चेतावनी स्थानीयहरूले दिएका छन्।
