कञ्चनपुर — सुदूरपश्चिम प्रदेशको समग्र पर्यटन क्षेत्रको प्रवर्द्धन र प्रचार–प्रसार गर्ने उद्देश्यले कञ्चनपुरमा बैशाख २६ देखि २९ गतेसम्म सुदूरपश्चिम प्रादेशिक पर्यटन महोत्सव (Far West Tourism Mart) आयोजना हुने भएको छ।
नेपाल पर्यटन बोर्डको २६ लाख ६० हजार र भीमदत्त नगरपालिकाको ५ लाख रुपैयाँको आर्थिक सहयोगमा आयोजना हुन लागेको महोत्सवमा भारत र नेपालका पर्यटन व्यवसायी, ट्राभल एजेन्सी, सरकारी प्रतिनिधि, विज्ञहरू लगायत सयौं सहभागी रहने आयोजकले जनाएका छन्।
महोत्सवको पहिलो दिन सुदूरपश्चिमका पर्यटकीय सम्भावनाका विषयमा कार्यपत्र प्रस्तुत हुनेछ। दोस्रो दिन सहभागीहरू महाकाली र कर्णाली नदीमा र्याफ्टिङ, टीकापुर र शुक्लाफाँटा निकुञ्जको अवलोकन भ्रमणमा जानेछन्।
भारतको दिल्लीदेखि सीमावर्ती शहरहरूसम्मका पर्यटन व्यवसायीहरूलाई निमन्त्रणा गरिएको र करिब ५० जनासम्मको सहभागिता सुनिश्चित भएको संयोजक राजेन्द्र केसीले जानकारी दिए।
महोत्सवमा सुदूरपश्चिमका कला, संस्कृति, जीवनशैली र पर्यटकीय सम्भावनालाई अन्तर्राष्ट्रिय बजारमा पु¥याउने उद्देश्य रहेको छ। “बिजनेस टु बिजनेस” छलफल र सञ्जाल विस्तारका कार्यक्रम महोत्सवका मुख्य आकर्षण रहने आयोजकको भनाइ छ।
