दोधारा चाँदनी नगरपालिका स्थित नगर अस्पतालको बर्थिङ सेन्टरमा रहेका सुत्केरी महिलाहरू तथा विपद् जोखिममा रहेका समुदायका केही बिपन्न परिवारहरूलाई न्यानो कम्बल वितरण गरिएको छ। UNICEF र NNSWA को सहयोगमा आयोजित कार्यक्रममा उपमेयर गंगादेवी देवी जोशी स्वयं नगर अस्पताल पुगेर कम्बल वितरण गर्नु भएको हो।
कम्बल पाएपछि एक सुत्केरी महिलाले भनिन्, “जाडो धेरै बढेको बेला अस्पतालमै न्यानो कम्बल पाउँदा धेरै सहज भएको छ। यस्तो सहयोगले हामीजस्ता गरिब परिवारलाई ठूलो राहत मिलेको छ।”
उपमेयर जोशीले चिसो मौसममा सुत्केरी महिला र जोखिममा रहेका परिवारलाई न्यानो सामग्री उपलब्ध गराउनु मानवीय जिम्मेवारी भएको बताउँदै यस्ता सहयोग कार्यक्रमलाई निरन्तरता दिइने उल्लेख गर्नु भयो। कार्यक्रमबाट लाभान्वित बिरामी र स्थानीय परिवारहरूले सहयोगप्रति आभार व्यक्त गरेका छन्।