कञ्चनपुर, वैशाख २१
सुदूरपश्चिमको कञ्चनपुरमा चट्याङ लागेर एक गर्भवती महिलाको ज्यान गएको छ भने उनका श्रीमान् गम्भीर घाइते भएका छन्।
शुक्लाफाँटा नगरपालिका–१२ तिल्कीमा आइताबार बिहान चट्याङ लागेर २४ वर्षीया लालमती रानाको मृत्यु भएको हो। दोदा नदी किनारमा तरबुजा टिप्दै गर्दा चट्याङ लागेपछि घटनास्थलमै लालमतीको ज्यान गएको इलाका प्रहरी कार्यालय झलारीका प्रहरी निरीक्षक राजेश बस्नेतले जानकारी दिए।
चट्याङ लागेर लालमतीका श्रीमान् २५ वर्षीय रतनसिंह राना गम्भीर घाइते भएका छन्। उनीहरूको अवस्था गम्भीर रहेकाले थप उपचारका लागि तयारी भइरहेको प्रहरीले जनाएको छ।
प्रहरी निरीक्षक बस्नेतका अनुसार घटनास्थलमा प्रहरी टोली पुगेर आवश्यक विवरण संकलन तथा अनुसन्धान गरिरहेको छ।
