कञ्चनपुर- कञ्चनपुर सरकारी जमिन अतिक्रमण बढ्दै गएको भन्दै कम्युनिस्ट युवा संगठन नेपाल (जिल्ला समिति कञ्चनपुर) ले औपचारिक ध्यानाकर्षण पत्र जारी गर्दै तत्काल कारबाहीको माग गरेको छ।
संगठनले भीमदत्त नगर विकास समितिअन्तर्गतको ६३८ विगाहा ८ कट्ठा १३ धुर सरकारी जमिनमा अवैध कब्जा, लिजको नाममा अनियमितता तथा संरचना निर्माण भइरहेको आरोप लगाएको छ। पत्रमा जिल्लाभरि नै सरकारी जमिन अतिक्रमणको समस्या फैलिँदै गएको उल्लेख गर्दै यस्ता सबै अतिक्रमण तुरुन्त हटाउनुपर्ने स्पष्ट माग गरिएको छ।
पटक–पटक ध्यानाकर्षण गराउँदा पनि सम्बन्धित निकाय मौन बसेको भन्दै संगठनले राज्यको उदासीनतामाथि प्रश्न उठाएको छ। यसले सरकारी सम्पत्ति संरक्षणमा गम्भीर लापरबाही देखिएको आरोप पनि लगाइएको छ।
साथै कञ्चनपुरका सांसद, जिल्ला प्रशासन कार्यालय तथा सरोकारवाला निकायलाई तत्काल हस्तक्षेप गरी अवैध संरचना हटाउन र अतिक्रमण नियन्त्रण गर्न कडा कदम चाल्न आग्रह गरिएको छ।
माग सम्बोधन नभए कडा आन्दोलनमा उत्रिने चेतावनी दिँदै संगठनले सरकारी जमिन संरक्षणमा ढिलाइ नगर्न सम्बन्धित निकायलाई सचेत गराएको छ।
