धनगढी-कैलालीको धनगढी उपमहानगरपालिका–१३ मा मंगलबार साँझ दुई समूहबीच झडप भएको छ। केटाहरूको समूहबीच भएको उक्त झडपमा केही व्यक्ति घाइते भएका छन् भने प्रहरीले १२ जनालाई नियन्त्रणमा लिएको जनाएको छ।
जिल्ला प्रहरी कार्यालय कैलाली का अनुसार झडपको कारणबारे हालसम्म विस्तृत विवरण प्राप्त हुन सकेको छैन।
स्थिति नियन्त्रणमा लिन नेपाली सेना, नेपाल प्रहरी तथा सशस्त्र प्रहरी बल को संयुक्त टोली परिचालन गरिएको थियो। सो क्रममा झडपमा संलग्न व्यक्तिहरूलाई नियन्त्रणमा लिइएको हो।
नियन्त्रणका क्रममा केही प्रहरीसमेत घाइते भएका छन् भने प्रहरीको एक गाडीमा सामान्य क्षति पुगेको छ। हाल घटनास्थलमा शान्ति–सुरक्षा कायम गर्न जिल्ला प्रहरी कार्यालयका डीएसपीको नेतृत्वमा थप प्रहरी परिचालन गरिएको छ।
