कञ्चनपुर क्षेत्र नं. ३ मा आगामी प्रतिनिधि सभा निर्वाचनका लागि उज्यालो नेपालबाट उम्मेदवार बनेका भिम कुमालले आजदेखि औपचारिक रूपमा घरदैलो कार्यक्रम सुरु गरेका छन्। घरदैलो अभियानको सुरुवात दोधारा चाँदनी नगरपालिका–७, कञ्चनभोजबाट गरिएको हो।
घरदैलोका क्रममा कुमालले स्थानीय मतदातासँग प्रत्यक्ष भेटघाट गर्दै पार्टीका नीति, कार्यक्रम र आफ्ना प्राथमिकता प्रस्तुत गरेका छन्। उनले शिक्षा, स्वास्थ्य, रोजगारी, कृषि र सुशासनका विषयलाई मुख्य एजेन्डाका रूपमा अघि सारेका छन्।
लामो समयदेखि सामाजिक अभियान र वैकल्पिक राजनीतिक धारमा सक्रिय रहेका कुमाल पछिल्लो समय उज्यालो नेपालको संगठन विस्तार र जनसम्पर्क अभियानमा सक्रिय रहँदै आएका छन्। परम्परागत राजनीतिक अभ्यासप्रति जनतामा बढ्दो निराशा रहेको उल्लेख गर्दै उनले इमानदार, जवाफदेही र जनमुखी राजनीति आवश्यक भएको बताएका छन्।
उज्यालो नेपालले देशभर वैकल्पिक राजनीतिक शक्ति निर्माण गर्ने उद्देश्यका साथ उम्मेदवार अघि सारेको जनाएको छ। कञ्चनपुर–३ मा भिम कुमालको उम्मेदवारीले स्थानीयस्तरमा नयाँ राजनीतिक बहस सुरु भएको विश्लेषकहरूको भनाइ छ।
घरदैलो कार्यक्रमलाई कञ्चनपुर क्षेत्र नं. ३ का विभिन्न वडामा क्रमशः विस्तार गर्ने तयारी रहेको उम्मेदवार पक्षले जनाएको छ।
