कंचनपुर । गृह मन्त्रालयले १२ जना सहसचिव र १ जना उपसचिवको सरुवा गरेको छ । शुक्रबार गृहमन्त्री ओमप्रकाश अर्यालस्तरीय निर्णयबाट उक्त सरुवा गरिएको हो ।
सरुवा गरिएकामध्ये ११ जना सहसचिवलाई विभिन्न जिल्लामा प्रमुख जिल्ला अधिकारी (सीडीओ) को जिम्मेवारी दिइएको छ भने १ जनालाई कारागार व्यवस्थापन विभागको महानिर्देशकको जिम्मेवारी प्रदान गरिएको छ ।
यसैक्रममा कञ्चनपुरको प्रमुख जिल्ला अधिकारीमा मदन कोइरालालाई जिम्मेवारी दिइएको छ । गृह मन्त्रालयको निर्णयअनुसार कोइराला कञ्चनपुर आउने भएका हुन् ।
यसअघि कञ्चनपुरका प्रमुख जिल्ला अधिकारी रहेका लक्ष्मण ढकालको इलाम सरुवा गरिएको छ ।
गृह मन्त्रालयका अनुसार प्रशासनिक कामलाई थप प्रभावकारी बनाउने उद्देश्यले नियमित प्रक्रिया अनुसार सरुवा गरिएको हो ।
