दोधारा चाँदनी, कञ्चनपुर – अषाढ १४
नेपाल सरकारका उद्योग, वाणिज्य तथा आपूर्ति मन्त्री दामोदर भण्डारीले कञ्चनपुरको दोधारा चाँदनीमा निर्माणाधीन सुख्खा बन्दरगाहको अवलोकन तथा निरीक्षण गर्नुभएको छ।
शनिबार सम्पन्न निरीक्षणमा मन्त्री भण्डारीसँगै स्थानीय जनप्रतिनिधि, सुरक्षाकर्मी र प्राविधिक टोलीको उपस्थिति रहेको थियो। निरीक्षणका क्रममा मन्त्री भण्डारीले बन्दरगाहको भौतिक संरचना, प्राविधिक योजना तथा निर्माण कार्यको प्रगति अवस्थाबारे जानकारी लिँदै उक्त परियोजनाले क्षेत्रीय व्यापार र आर्थिक वृद्धिमा उल्लेखनीय योगदान दिने विश्वास व्यक्त गर्नुभयो।
सुख्खा बन्दरगाहसम्बन्धी महत्त्वपूर्ण छलफल आगामी सोमबार भारत सरकारका दूतावास प्रतिनिधिसँग तय भएको छ। सो छलफलमा बन्दरगाह निर्माणस्थलको जग्गा हस्तान्तरण र औपचारिक सिलान्यास कार्यक्रमको तयारीबारे विचारविमर्श हुने बताइएको छ।
प्रधानमन्त्री स्तरको उपस्थितिमा सिलान्यास
उद्योग मन्त्रालयका अनुसार औपचारिक सिलान्यास नेपालका प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीको उपस्थितिमा गरिने तयारी छ।
पश्चिम नेपालको आर्थिक विकासमा टेवा
नेपाल–भारत सीमावर्ती क्षेत्रमा निर्माण भइरहेको यो सुख्खा बन्दरगाहले आयात–निर्यात तथा ढुवानी व्यवस्थापनमा ठूलो सहजता ल्याउने अपेक्षा गरिएको छ। मन्त्री भण्डारीले निर्माण कार्य समयमै सम्पन्न गर्न निर्देशन दिँदै स्थानीय सरोकारवाला निकायहरूसँग समन्वयमा काम गर्न आग्रह गर्नुभयो।
हालसम्म नेपालतर्फ चार लेनको पुल निर्माण सम्पन्न भइसकेको छ भने छ लेनको पहुँचमार्ग कालोपत्र गरिएको छ। भारतको सीमासम्मको पहुँच सडक पनि तीव्र गतिमा निर्माण भइरहेको छ, जसले ट्राफिक र मालवाहक सवारीको आवागमनलाई सहज बनाउनेछ।
चौथो ड्राइपोर्ट बन्ने तयारी
यो ड्राइपोर्ट नेपालमा प्रस्तावित चौथो सुख्खा बन्दरगाह हो, जसले कञ्चनपुर, कैलाली, डडेल्धुरा, बैतडी लगायतका सुदूरपश्चिम क्षेत्रहरूमा व्यापार विस्तार र रोजगारीका अवसर सिर्जना गर्नेछ।
पाँच वर्षभन्दा बढी समयदेखि तयारी हुँदै आएको यो परियोजनाको कार्यान्वयन अहिले तीव्र गतिमा अघि बढिरहेको छ। यसले नेपाल–भारत आर्थिक सम्बन्ध थप मजबुत बनाउँदै पश्चिम नेपालको समृद्धिमा टेवा पुर्याउने विश्वास गरिएको छ।
