दोधारा चाँदनी खबर, कञ्चनपुर ।
नेपाल सुपर प्रिमियर लिग (NSPL) २०२५ को लिलामीमा दोधारा चाँदनीका युवा क्रिकेटर साजन बिटालु लुम्बिनी रायडर्सले ९० हजार रुपैयाँमा अनुबन्ध गरेको छ।
लुम्बिनी रायडर्सले साजनलाई आफ्नो स्क्वाडमा समावेश गरेपछि सुदूरपश्चिमका क्रिकेटप्रेमीहरूमा उत्साह छाएको छ।
स्थानीय स्तरमा निरन्तर उत्कृष्ट प्रदर्शन गर्दै आएका साजन बलिङ र फिल्डिङमा निपुण खेलाडी मानिन्छन्। दोधारा चाँदनी क्षेत्रका विभिन्न टुर्नामेन्टहरूमा उनको सक्रिय सहभागिता र प्रदर्शनले उनलाई अहिले राष्ट्रिय स्तरको लिगमा पुर्याएको हो।
लुम्बिनी रायडर्सले साजनमाथि गरेको विश्वासले सुदूरपश्चिमका युवाहरूमा नयाँ ऊर्जा भरेको छ।
स्थानीय खेलप्रेमीहरूले साजनलाई बधाई दिँदै आगामी प्रतियोगितामा अझ उत्कृष्ट प्रदर्शनको शुभकामना दिएका छन्।
NSPL २०२५ अन्तर्गत देशभरका फ्रेन्चाइज क्लबहरूले नयाँ प्रतिभालाई अवसर दिइरहेका छन्।
तीमध्ये साजन बिटालुको अनुबन्ध सुदूरपश्चिम क्षेत्रका लागि गर्वको विषय बनेको छ।
