दोधारा चाँदनी, कञ्चनपुर — पछिल्लो मौसम पूर्वानुमानका आधारमा कञ्चनपुरको दोधारा चाँदनी नगरपालिकाले बाढीको सम्भावित जोखिमलाई ध्यानमा राख्दै नागरिकहरूलाई सतर्कता अपनाउन आग्रह गरेको छ।
नगरपालिकाको कार्यालयद्वारा जारी गरिएको सूचनामा आज २०८२ साउन २० गते दिउँसो १:०० बजेपछि दोधारा चाँदनी क्षेत्रका विभिन्न स्थानहरूमा मूसलधारे वर्षा हुने सम्भावना रहेको जनाइएको छ। नेपाल सरकार, मौसम पूर्वानुमान महाशाखाबाट प्राप्त जानकारी अनुसार आगामी एक-दुई दिनमा भारी वर्षाको सम्भावना देखिएको हो।
त्यस्तै, भारतस्थित धौलीगंगा जलविद्युत् परियोजनाका बाँधहरू साउन २१ गते बिहान ६:०० बजे सम्म खोलिने जानकारी प्राप्त भएकोले महाकाली नदीमा जलस्तर उल्लेख्य रूपमा बढ्न सक्ने जोखिम रहेको जनाइएको छ। यस्तो अवस्थामा नदी किनार र तटीय क्षेत्रका बासिन्दाहरू विशेष सतर्क रहन नगरपालिकाले आग्रह गरेको छ।
महाकाली नदि,जोगबुडा नदि किनार क्षेत्र तथा नदी आसपासका वस्तीहरू उच्च जोखिममा पर्ने भएकाले सम्भावित जोखिम व्यवस्थापनका लागि पूर्वतयारी गर्न र आवश्यक सूचनाहरू समुदायमा समयमै प्रवाह गर्न नगर कार्यालयले सबै सरोकारवालालाई आग्रह गरेको छ।
