दोधारा चाँदनी, कञ्चनपुर।
दोधारा चाँदनी नगरपालिका वडा नं. ६ ले केन्द्र तथा प्रदेश सरकारबाट महत्वपूर्ण बजेट भित्र्याउन सफल भएको छ। वडा अध्यक्ष ओम बहादुर बस्नेतको पहलमा विद्युत लाइन विस्तार तथा मर्मतका लागि १८ लाख ५० हजार रुपैयाँ र कृषि व्यवस्थापन कार्यक्रमका लागि ९९ लाख रुपैयाँ बजेट वडामा ल्याइएको हो।

वडा अध्यक्ष बस्नेतका अनुसार विद्युत लाइन विस्तार तथा मर्मतको काम सुरु भइसकेको छ भने कृषि प्रवन्धन सम्बन्धी कार्यक्रम आगामी आर्थिक वर्षदेखि कार्यान्वयनमा आउनेछ। उनले वडाको दीर्घकालीन विकासका लागि आवश्यक स्रोतसाधन जुटाउन निरन्तर पहल गरिरहेको बताए।

स्थानीय कमला थापाका अनुसार दोधारा चाँदनी नगरपालिकाभित्र सबैभन्दा तीव्र र बढी विकास भएको वडा नं. ६ नै हो। “देशमा जति परिवर्तन भए पनि हाम्रो वडाको विकास कहिल्यै रोकिएको छैन। अहिले पनि करिब १ करोड १८ लाख रुपैयाँ बराबरको बजेट ल्याएर विकासका नयाँ ढोका खोलिएको छ,” उनले भनिन्।

वडा सदस्य सपना रानाले नगरपालिकाबाट प्राप्त हुने ५०–६० लाख रुपैयाँको बजेटले मात्र वडाको समग्र विकास सम्भव नहुने बताउँदै वडा अध्यक्ष बस्नेतले प्रदेश र केन्द्र सरकारसम्म पुगेर थप बजेट ल्याएकै कारण वडामा उल्लेखनीय विकास सम्भव भएको बताइन्।

“वडाको समृद्धिका लागि आवश्यक योजनाहरू कार्यान्वयन गर्न स्थानीय तहको नियमित बजेट मात्र पर्याप्त थिएन। वडा अध्यक्ष विकासका लागि प्रदेश र केन्द्र धाउनुभयो, जसको परिणामस्वरूप आज वडामा ठूला योजनाहरू सञ्चालन हुन सकेका छन्,” रानाले भनिन्।

वडा अध्यक्ष बस्नेतले सरकार जुनसुकै दलको बने पनि त्यसको उद्देश्य जनताको सेवा र विकास नै हुनुपर्ने धारणा व्यक्त गरे। “जनताका गुनासा, आवश्यकता र दुःखलाई सरकारसम्म पुर्‍याउन सक्नुपर्छ। जनप्रतिनिधिको मुख्य जिम्मेवारी नै नागरिकको आवाज सम्बन्धित निकायसम्म पुर्‍याउनु हो,” उनले भने।

उनले वडा मात्र नभई सम्पूर्ण पालिकाको विकास सम्भव रहेको उल्लेख गर्दै त्यसका लागि सबै तहका सरकारबीच समन्वय, प्रतिबद्धता र विकासप्रतिको इच्छाशक्ति आवश्यक पर्ने बताए।

केन्द्र र प्रदेशबाट थप बजेट भित्रिएसँगै वडा नं. ६ मा विद्युत सेवा सुधार, कृषि क्षेत्रको आधुनिकीकरण तथा स्थानीय उत्पादन वृद्धि हुने अपेक्षा गरिएको छ। स्थानीयवासीले पनि विकास निर्माणका कामले गति लिँदै गएको भन्दै आगामी दिनमा अझ ठूला योजनाहरू सञ्चालन हुने विश्वास व्यक्त गरेका छन्।

The post दोधारा चाँदनी–६ मा केन्द्रको १ करोड १७ लाख ५० हजार बजेट, विद्युत र कृषि क्षेत्रमा ठूला योजना first appeared on Dodhara Chandani khabar.

भुपेन्द्र ओली
कञ्चनपुर, २१जेठ
छिमेकी मुलुक भारतमा कञ्चनपुरका दुई नेपाली नागरिकमाथि कुटपिट भएको छ । जिल्लाको दोधाराचाँदनी नगरपालिका १० प्रतिभाटोलका सन्दीप परियार र दिपिका परियारमाथि कुटपिट भएको हो । कुटपिटबाट सन्दीपको टाउको र दिपीकाको पेट सहितका शरिरमा चोट लागेको छ । गाँउमा पुगेपछि स्थानीय अस्पतालमा उनीहरुले उपचार गराएका थिए ।
सीमावर्ती भारतीय बजार घुम्न गएर घर फर्किने बेला नौजलिया क्षेत्रमा कुटपिट भएको उनीहरुले बताएका छन ।
भारतीय युवा समुहले नेपाली नागरिकलाई होच्याउन खोजेपछि दुई समुहविच वादविवादसंगै भारतीय समुहले कुटपिट गरेको घाईतेहरुको भनाई छ । घाईते सन्दीप परियारले भारतीय ५-७ युवाहरुको समुहले बहिनीलाई जिस्क्याउन थालेपछि यस्तो नगर्न आग्रह गरेपछि उनीहरुले आफुमाथि कुटपिट शुरु गरेको बताए ।
‘हामीहरुमाथि उनीहरु मात्रै होईन अरु गाँउले आएरपनि आक्र्रंमण गर्न थाले हामीले नेपालतिर भागेर ज्यान बचाए, ‘उनले भने, ‘भाग्नेक्रममा घटना स्थलमै तीन मोटरसाईकल थिए, दुई चिनेजानेकै भारतीयको सहयोगमा फिर्ता लियौँ, ‘उनले भने, ‘एक मोटरसाईकल तोडफोड गरेर ल्याउन सकेनौँ ।’
कञ्चनपुरका सहायक प्रमुख जिल्ला अधिकारी मोहनचन्द्र जोशीले उक्त घटनाका विषयमा प्रशासनले सुरक्षा निकाय मार्फत बुझेर अघि बढ्ने बताए । सहायक प्रजिअ जोशीले घटनाको आधिकारिक प्रशासनमा नआएकाले बुझेर सोही अनुरुप समस्या समाधान तर्फ प्रशासनले अग्रसरता लिने बताए । पीडितदेखि स्थानीयले दोषिमाथि कानुनी कार्बाहीको माग अघि सारेका छन । प्रधानमन्त्री बालेन शाहले नेपाल भारतको सीमा विवादका विषयमा ससंसदमै राखेको धारणालाई लिएर भारतीयले नेपाली नागरिक हेप्न थालेको कतिपय स्थानीयले तर्क राखिरहेका छन । भने, कतिपयले भैपरि आउने घटना भएकाले सीमावर्ती दुवै देशका नेपाली नागरिकले आपसी मेलमिलापका माध्यमबाट विवाद निरुपण गर्नुपर्ने धारणा राखिरहेका छन ।

The post कञ्चनपुरमा भारतीय नागरिकद्वारा भारतमा दुई नेपालीमाथि कुटपिट first appeared on Dodhara Chandani khabar.

दोधारा चाँदनी, कञ्चनपुर – दोधारा चाँदनी नगरपालिका–१० भण्डारी टोलका फोक्सो तथा स्वासप्रश्वास नलीको जटिल रोगबाट पीडित अमर बहादुर भण्डारीको उपचार, खाद्यान्न तथा आधारभूत आवश्यकताका लागि दोधारा चाँदनी कम्युनिटी नेटवर्क ग्रुप ले सहयोग अभियान सुरु गरेको छ।

वर्षौंदेखि विकट बस्तीमा एक्लै जीवन बिताइरहेका अमर बहादुरको पीडादायी अवस्था सार्वजनिक भएपछि देश तथा विदेशमा रहेका नेपालीहरू सहयोगका लागि जुट्न थालेका छन्। रोग, गरिबी र एक्लोपनसँग संघर्ष गरिरहेका अमर बहादुरको कथा सामाजिक सञ्जाल र सञ्चार माध्यममार्फत बाहिर आएपछि धेरै व्यक्तिहरूले सहयोगको हात अगाडि बढाएका हुन्।

अमर बहादुर लामो समयदेखि फोक्सो तथा स्वासप्रश्वास नलीको जटिल रोगबाट पीडित छन्। आर्थिक अभावका कारण नियमित उपचार गर्न नसकिरहेका उनी जीर्ण तथा चुहिने टहरोमा एक्लै बस्दै आएका छन्। परिवारको साथसमेत नभएका उनले जीवनभर विवाह नगरी एक्लै जीवन बिताउँदै आएका छन्।

हालै अमर बहादुरले आफ्नो पीडा सुनाउँदै “मलाई बच्नु छ” भनेपछि उनको अवस्था धेरैको ध्यानाकर्षणको केन्द्र बनेको थियो। उनको यही भावुक आग्रहले देश तथा विदेशमा रहेका नेपालीहरूको मन छोएको स्थानीयवासी बताउँछन्।

यसअघि डा. गगन चौधरीले अमर बहादुरको घरमै पुगेर नेबुलाइजर मेसिन तथा आवश्यक औषधि सहयोग गरेका थिए। अमर बहादुरको घरको अवस्था देखेर आफू भावुक भएको र आगामी दिनमा पनि उपचारमा सहयोग गर्ने प्रतिबद्धता जनाएको डा. चौधरीले बताएका थिए।

दोधारा चाँदनी कम्युनिटी नेटवर्क ग्रुपका अनुसार अभियानमार्फत संकलित सहयोग रकम अमर बहादुरको उपचार, औषधि, खाद्यान्न तथा अन्य अत्यावश्यक आवश्यकतामा खर्च गरिनेछ। अभियान सुरु भएसँगै देश तथा विदेशबाट आर्थिक सहयोग प्राप्त हुन थालेको समूहले जनाएको छ।

समूहले मानवताको भावनाका साथ अभियानमा सहभागी भई सहयोग गर्न सबैलाई आग्रह गरेको छ। सानो सहयोगले पनि अमर बहादुरको जीवनमा ठूलो परिवर्तन ल्याउन सक्ने भन्दै सहयोगी हातहरू निरन्तर आवश्यक रहेको समूहको भनाइ छ।

रोग, अभाव र एकान्तसँग संघर्षरत अमर बहादुरका लागि अहिले विभिन्न ठाउँबाट जुटिरहेको सहयोगले नयाँ आशा जगाएको छ। स्थानीयवासीले पनि उनको दीर्घकालीन उपचार, सुरक्षित आवास तथा जीवनयापनका लागि सम्बन्धित निकायको ध्यानाकर्षण गराएका छन्।

दोधारा चाँदनी कम्युनिटी नेटवर्क ग्रुपमा जोडिन याँहा क्लिक गर्नुस ।

Facebook

The post ‘मलाई बच्नु छ’ भन्ने अमर बहादुरका लागि सहयोग जुट्न थाल्यो, दोधारा चाँदनी कम्युनिटी नेटवर्क ग्रुपद्वारा सहयोग अभियान सुरु first appeared on Dodhara Chandani khabar.

कञ्चनपुर, जेठ १६ । दोधारा चाँदनी नगरपालिका–१० शुर्खेती टोलका अन्दाजी ६४ वर्षीय टोप बहादुर थापाको महाकाली नदीमा डुबेर मृत्यु भएको छ।

स्थानीयका अनुसार थापा शनिबार माछा मार्न महाकाली नदीमा गएका थिए। सोही क्रममा नदीमा डुबेका उनको मृत्यु भएको हो।

मृतकको शव परीक्षणका लागि दोधारा चाँदनी नगर अस्पतालमा लगिएको छ। घटनाबारे प्रहरीले थप अनुसन्धान गरिरहेको जनाएको छ।

The post दोधारा चाँदनीमा महाकाली नदीमा डुबेर वृद्धको मृत्यु first appeared on Dodhara Chandani khabar.

मनोबल कमजोर बनाउने निर्णय भएको भन्दै नर्सिङ कर्मचारीद्वारा अत्यावश्यक बाहेकका सेवा बन्द गर्ने निर्णय

दोधारा चाँदनी- दोधारा चाँदनी अस्पतालमा कार्यरत नर्सिङ कर्मचारीहरूले अस्पताल सञ्चालन तथा व्यवस्थापन समितिको निर्णयप्रति असन्तुष्टि जनाउँदै अत्यावश्यक प्रसूति सेवा बाहेक अन्य सम्पूर्ण सेवा बन्द गर्ने घोषणा गरेका छन्।

अस्पताल सञ्चालन तथा व्यवस्थापन समितिले २०८३/०२/०९ गते गरेको निर्णय नं. १० ले नर्सिङ कर्मचारीहरूको मनोबल कमजोर बनाएको भन्दै उनीहरूले आपत्ति जनाएका हुन्। नर्सिङ कर्मचारीहरूले आफूहरू २४ सै घण्टा निरन्तर रूपमा व्यक्तिगत स्वास्थ्यको समेत ख्याल नगरी निस्वार्थ सेवा दिँदै आएको उल्लेख गर्दै अस्पताल प्रशासन र व्यवस्थापन समितिले आफ्नो मेहनत तथा कर्तव्यनिष्ठाको कदर नगरेको आरोप लगाएका छन्।

उनीहरूले सेवा दिने क्रममा हुने विभिन्न घटनाको सम्पूर्ण दोष नर्सिङ कर्मचारीमाथि मात्रै थोपार्ने गरिएको तथा आफूहरूले दिने सेवामाथि समेत प्रश्न उठाइएको अनुभव भएको बताएका छन्।

यसै विषयलाई लिएर नर्सिङ कर्मचारीहरूले आजकै मितिदेखि अत्यावश्यक प्रसूति सेवा बाहेक अन्य सम्पूर्ण सेवा बन्द गर्ने निर्णय गरेका छन्। उनीहरूले व्यवस्थापन समितिको निर्णय नसच्याएसम्म आन्दोलन जारी रहने जनाएका छन्।

अस्पताल सञ्चालन तथा व्यवस्थापन समितिले २०८२/१२/०३ गते दोधारा चाँदनी नगरपालिका–५ निवासी नितु बुढा मगरबाट जन्मिएको नवजात शिशुको मृत्यु भएको घटनालाई आधार बनाएर छानबिन अघि बढाएको थियो। उक्त घटनापछि ड्युटीमा रहेकी स्टाफ नर्स कमला महताले घटनाको छानबिन गरिपाउँ भन्दै निवेदन पेश गरेकी थिइन्।

छानबिन समितिको प्रतिवेदनका आधारमा ड्युटीमा लापरवाही भएको निष्कर्ष निकाल्दै समितिले पीडित पक्षले व्यहोर्नुपर्ने उपचार खर्च ड्युटीमा रहेका नर्सिङ कर्मचारीहरूबाट असुल गर्ने निर्णय गरेको थियो। यही निर्णयप्रति असन्तुष्टि जनाउँदै नर्सिङ कर्मचारीहरू आन्दोलनमा उत्रिएका हुन्।

The post नवजात शिशु मृत्यु प्रकरणमा नर्सबाट रकम असुल्ने निर्णयपछि दोधारा चाँदनी अस्पतालमा विवाद first appeared on Dodhara Chandani khabar.

दोधारा चाँदनी- दोधारा चाँदनी नगरपालिका–६ का वडाध्यक्ष ओम बहादुर बस्नेतले आफ्नो वडामा निर्माणाधीन सडक कालोपत्रे कार्यमा भइरहेको ढिलासुस्तीप्रति कडा असन्तुष्टि जनाएका छन्।

वडा नं. ६ को सुनाखरी टोलदेखि संगम चौक हुँदै निरन्कारी भवनसम्म कालोपत्रे गर्ने ठेक्का एक निर्माण कम्पनीले लिएको दुई वर्ष बितिसक्दा पनि काम सम्पन्न नभएको भन्दै उनले सामाजिक सञ्जालमार्फत आवाज उठाएका हुन्। उक्त ठेक्काको समयावधि समेत सकिइसकेको उनले उल्लेख गरेका छन्।

बस्नेतले दुई वर्षसम्म स्थानीय नागरिकले धुलो, हिलो र सडक समस्याका कारण निकै सास्ती खेप्नुपरेको बताए। निर्माण कम्पनीका सञ्चालकलाई सयौं पटक अनुरोध गर्दा समेत काम अघि नबढाएको भन्दै उनले आक्रोश व्यक्त गरेका छन्।

“सरकार तपाईंकै पार्टीका कार्यकर्ता हुन भने अब के रुखमा बाँधेर कारबाही हुन्छ कि जे गरेर हुन्छ, छिटो सडक बनाउन लगाइदिनु,” भन्दै उनले कार्यपालिका बैठकमा समेत विषय उठाउनुपर्ने र आवश्यक प्रक्रिया अघि बढाउनुपर्ने बताएका छन्।

उनले समयमै काम सम्पन्न नभएसम्म निरन्तर खबरदारी र आन्दोलनका कार्यक्रम अगाडि बढ्ने चेतावनी दिएका छन्। साथै, निर्माण कम्पनीले काम नगर्ने तर विरोध गरेको भन्दै गाउँभरि भ्रम फैलाउने गरेको आरोप पनि लगाएका छन्।

“बरु मलाई जे भन, सहन तयार छु तर समयमा काम गर,” भन्दै बस्नेतले विकास निर्माणमा ढिलाइ अस्वीकार्य भएको बताएका छन्।

The post सरकार तपाईंकै पार्टीका कार्यकर्ता हुन भने अब के रुखमा बाँधेर कारबाही हुन्छ कि जे गरेर हुन्छ, छिटो सडक बनाउन लगाइदिनु, वडाध्यक्ष ओम बहादुर बस्नेतले आक्रोश व्यक्त गरे। first appeared on Dodhara Chandani khabar.

दोधारा चाँदनी– कञ्चनपुरको दोधारा चाँदनी नगरपालिकामा १७ औँ जिल्ला स्तरीय राष्ट्रपति रनिङ शिल्ड प्रतियोगिता आयोजना हुने भएको छ। प्रतियोगिताको औपचारिक तयारीस्वरूप आज नगरपालिकामा आयोजित एक कार्यक्रमबीच जिल्ला खेलकुद विकास समिति तथा नगर खेलकुद समितिले राष्ट्रपति रनिङ शिल्डको झण्डा नगरपालिकालाई हस्तान्तरण गरेका हुन्।

कार्यक्रममा दोधारा चाँदनी नगर खेलकुद समितिका अध्यक्ष तेजराज गिरी, नगर प्रमुख किशोर लिम्बु, नगर उपप्रमुख गंगादेवी जोशी, प्रमुख प्रशासकीय अधिकृत, विभिन्न वडाका वडाध्यक्ष, जिल्ला खेलकुद विकास समितिका अध्यक्ष ज्ञानेन्द्र बहादुर सिंह, नगर खेलकुद समितिका पदाधिकारी लगायतको उपस्थिति रहेको थियो।

झण्डा हस्तान्तरण कार्यक्रममा बोल्दै वक्ताहरूले राष्ट्रपति रनिङ शिल्ड विद्यालय तहबाट खेल प्रतिभा पहिचान गर्ने महत्वपूर्ण प्रतियोगिता भएको बताएका थिए। उनीहरूले खेलकुदले विद्यार्थीमा अनुशासन, नेतृत्व क्षमता र प्रतिस्पर्धात्मक भावना विकास गर्ने उल्लेख गर्दै प्रतियोगिता सफल बनाउन सबै पक्षको सहकार्य आवश्यक रहेको बताए।

राष्ट्रपति रनिङ शिल्ड नेपालमा विद्यालयस्तरीय खेलकुदको सबैभन्दा प्रतिष्ठित प्रतियोगितामध्ये एक मानिन्छ। विद्यालय तहबाटै प्रतिभाशाली खेलाडी उत्पादन गर्ने उद्देश्यले सुरु गरिएको यो प्रतियोगिता पहिले “वीरेन्द्र रनिङ शिल्ड” नामबाट सञ्चालन हुने गरेको थियो। गणतन्त्र स्थापना पश्चात् यसको नाम “राष्ट्रपति रनिङ शिल्ड” राखिएको हो।

नेपाल सरकारको युवा तथा खेलकुद मन्त्रालय तथा राष्ट्रिय खेलकुद परिषद्को समन्वयमा सञ्चालन हुने यस प्रतियोगितामा एथलेटिक्स, भलिबल, कबड्डी, कराते, तेक्वान्दो, उसु लगायतका विभिन्न खेल समावेश गरिन्छ। स्थानीय तहबाट छनोट भएका उत्कृष्ट खेलाडीहरूले जिल्ला, प्रदेश हुँदै राष्ट्रिय स्तरसम्म प्रतिस्पर्धा गर्ने अवसर पाउने व्यवस्था रहेको छ।

दोधारा चाँदनीमा हुन लागेको १७ औँ जिल्ला स्तरीय राष्ट्रपति रनिङ शिल्ड प्रतियोगितामा जिल्लाभरका विद्यालयका विद्यार्थी खेलाडीहरूको सहभागिता रहने अपेक्षा गरिएको छ। प्रतियोगिताले स्थानीय खेलकुद क्षेत्रलाई थप सक्रिय बनाउने विश्वास लिइएको छ।

The post दोधारा चाँदनीमा हुने भयो १७ औँ जिल्ला स्तरीय राष्ट्रपति रनिङ शिल्ड first appeared on Dodhara Chandani khabar.

दोधारा- सुदूरपश्चिमको मौलिक देउडा संस्कृतिलाई नयाँ स्वादमा प्रस्तुत गर्दै गायक गणेश सिंह र गायिका पूर्णकला बीसी को आवाजमा सजिएको नयाँ देउडा गीत ‘गलि परानको’ सार्वजनिक गरिएको छ। परम्परागत देउडा भाकासँग आधुनिक प्रस्तुति मिसाएर तयार गरिएको गीतले दर्शक तथा श्रोतामाझ राम्रो प्रतिक्रिया पाइरहेको छ।

गीतमा राजेन्द्र शाह ‘बीपी’ को शब्द तथा लय रहेको छ भने सङ्गीत संयोजन चर्चित एरेन्जर विनोद बाजुरेली ले गर्नुभएको हो। राजधानीस्थित मालश्री स्टुडियो मा रेकर्ड गरिएको गीतले सुदूरपश्चिमेली कला र संस्कृतिको मौलिकपनलाई उजागर गर्ने प्रयास गरेको निर्माण टिमले जनाएको छ।

गीतको भिडियो पनि उत्तिकै आकर्षक बनेको छ। निर्देशक भीम थापा को निर्देशनमा तयार गरिएको भिडियोमा गायक गणेश सिंह स्वयं र मोडल कल्पना लेखक मुख्य भूमिकामा देखिएका छन्। साथै गोविन्द, बल्लभ भट्ट, सुरेश चन्द, गगन धामी, लक्ष्मण अधिकारी, प्रदीप पाल र मीन धानुक लगायत कलाकारहरूको अभिनयले भिडियोमा थप जीवन्तता दिएको छ।

सुदूरपश्चिमका ग्रामीण परिवेश, रहनसहन र प्राकृतिक सौन्दर्यलाई समेटिएको भिडियोको छायांकन अमृत उपाध्याय ले गर्नुभएको हो भने श्रृङ्गारतर्फ मेनुका साउद को योगदान रहेको छ।

देउडा संगीतमा पछिल्लो समय मौलिकता हराउँदै गएको चर्चा भइरहेका बेला ‘गलि परानको’ ले पुरानो संस्कृतिको स्वादलाई नयाँ पुस्तासम्म पुर्‍याउने अपेक्षा गरिएको छ।

भिडियो हेर्नुहोस

The post देउडा संगीतमा मौलिकता फर्काउने प्रयास, ‘गलि परानको’ सार्वजनिक first appeared on Dodhara Chandani khabar.

कञ्चनपुरमा ITF तेक्वान्दो महासंघ कञ्चनपुर को सातौँ जिल्ला अधिवेशन सम्पन्न भएको छ। अधिवेशनबाट नयाँ नेतृत्व चयन गर्दै अध्यक्ष पदमा सुजित श्रेष्ठ निर्वाचित भएका छन्।

अधिवेशन सौहार्दपूर्ण तथा निष्पक्ष वातावरणमा सम्पन्न भएको आयोजकले जनाएको छ। कार्यक्रममा सहभागी वक्ताहरूले नव–निर्वाचित नेतृत्वको कार्यकालमा जिल्लामा तेक्वान्दो खेललाई अझ व्यवस्थित, सशक्त र खेलाडीमैत्री बनाउने विश्वास व्यक्त गरेका छन्।

नव–निर्वाचित अध्यक्ष श्रेष्ठ कञ्चनपुर जिल्लामा सामाजिक कार्यमा निरन्तर सक्रिय रहँदै आएका व्यक्तित्वका रूपमा परिचित छन्। उनी विभिन्न सामाजिक अभियानमा अग्रसर हुँदै अन्यायमा परेका व्यक्तिहरूको आवाज उठाउने कार्यमा समेत सक्रिय रहँदै आएका छन्।

वक्ताहरूले खेलकुद क्षेत्रको विकास, युवा पुस्तालाई खेलतर्फ आकर्षित गर्ने अभियान तथा खेलाडीहरूको क्षमता अभिवृद्धिमा नयाँ समितिले प्रभावकारी भूमिका निर्वाह गर्ने अपेक्षा व्यक्त गरेका छन्। साथै तेक्वान्दो खेलको प्रवर्द्धन, संगठन विस्तार र खेलाडीहरूको हकहित संरक्षणका लागि नयाँ नेतृत्वले सक्रिय रूपमा कार्य गर्ने प्रतिबद्धता जनाएको छ।

The post कञ्चनपुरमा तेक्वान्दो खेललाई सशक्त बनाउने प्रतिबद्धतासहित सुजित श्रेष्ठ नेतृत्वको नयाँ समिति चयन first appeared on Dodhara Chandani khabar.

दोधारा चाँदनी नगरपालिका–६ गरन्जा चोक नजिक मोटरसाइकलको ठक्करबाट एक जना घाइते भएका छन्।

आज वर्ष १९ का कमल सिजालीले चलाएको भारतीय नम्बर प्लेटको मोटरसाइकल (UK06B05242) ले दोधारा चाँदनी नगरपालिका–६ भैरबथान टोल बस्ने वर्ष ५६ का सन्त बहादुर थापा मगरलाई ठक्कर दिएको हो।

दुर्घटनामा घाइते भएका थापा मगरको टाउकोमा चोट लागेको प्रहरीले जनाएको छ। उनलाई प्रारम्भिक उपचारका लागि दोधारा चाँदनी अस्पताल लगिएको थियो। अस्पतालमा प्राथमिक उपचारपछि थप उपचारका लागि भारतको खटिमा रिफर गरिएको छ।

The post दोधारा चाँदनीमा मोटरसाइकलको ठक्करबाट एक जना घाइते first appeared on Dodhara Chandani khabar.