कञ्चनपुर — बेलडाँडी गाउँपालिकाकी उपाध्यक्ष शान्ति नाथ विरुद्ध फेरि गम्भीर आरोप सार्वजनिक भएको छ।

कञ्चन धामी, जो बिमल धामी की श्रीमती हुन्, उनले सामाजिक सञ्जालमार्फत आफ्नो घरमा मानिस पठाएर परिवारलाई त्रास सिर्जना गरिएको दाबी गरेकी छन्। उनका अनुसार हालैको समाचार प्रकाशनप्रति असन्तुष्टि जनाउँदै उपाध्यक्ष नाथको संलग्नतामा यस्तो गतिविधि भएको आरोप लगाइएको हो।

धामीले आफ्ना श्रीमान् बिमल धामीबाट कुनै गल्ती भएको भए कानुनी प्रक्रिया अपनाउन आफूहरू तयार रहेको बताउँदै निर्दोष परिवारमाथि दबाब र डर देखाउनु अस्वीकार्य भएको बताएकी छन्। “गल्ती भए कानुनी कारबाही भोग्न तयार छौँ, तर बालबच्चा र परिवारलाई त्रास देखाउनु उचित होइन,” उनले उल्लेख गरेकी छन्। साथै, उनले घटनाका क्रममा प्रहरी प्रशासन मौन बसेको आरोप लगाउँदै सुरक्षा दिनुपर्ने मागसमेत गरेकी छन्।

उपाध्यक्ष शान्ति नाथ यसअघि पनि विभिन्न विवादमा तानिँदै आएकी छन्। उनीमाथि ज्यानसम्बन्धी कसुरअन्तर्गत अनुसन्धान भइरहेको छ। त्यस्तै, महालेखापरीक्षकको प्रतिवेदनमा नियमविपरीत भत्ता लिएको विषय उठेको थियो भने कृषक समूहसँग अनुदानसम्बन्धी रकम माग गरेको भन्ने आरोपसमेत यसअघि चर्चामा आएको थियो, जसलाई उनले अस्वीकार गर्दै आएकी छन्।

The post समाचार लेखेको आक्रोश ? पत्रकार बिमल धामीको घरमा उपाध्यक्ष शान्ति नाथले मान्छे पठाएको आरोप first appeared on Dodhara Chandani khabar.

दोधारा चाँदनी नगरपालिका, शिक्षा, युवा तथा खेलकुद शाखाले आधारभूत तह (कक्षा ८) को परीक्षा २०८२ को नतिजा सार्वजनिक गरेको छ। सार्वजनिक विवरणअनुसार सामुदायिक र निजी गरी नगरपालिकाभित्रका २३ विद्यालयबाट १,१३९ जना विद्यार्थी परीक्षामा सहभागी भएका थिए।

तीमध्ये ७५३ जना विद्यार्थी उत्तीर्ण भएका छन् भने समग्र उत्तीर्ण प्रतिशत ६६ रहेको छ। विद्यालयगत नतिजा अनुसार हिमालयन चाँदनी, युनिक सनराइज, नोभाइस तथा सुदूरपश्चिम विद्यालयले शतप्रतिशत नतिजा हासिल गर्दै उत्कृष्ट प्रदर्शन गरेका छन्। विद्यार्थी संख्याका हिसाबले शारदा सरस्वती माध्यमिक विद्यालयमा सबैभन्दा बढी विद्यार्थी सहभागी भएका थिए।

गत वर्षको तुलनामा यस वर्ष नतिजामा उल्लेखनीय सुधार देखिएको शिक्षा शाखाले जनाएको छ। गत वर्ष कुल ९१० विद्यार्थीमध्ये ८६८ जना परीक्षामा सहभागी भएका थिए। तीमध्ये १८५ जना मात्र उत्तीर्ण भएका थिए भने ७२५ जना अनुत्तीर्ण भएका थिए। त्यस अवधिमा ३ वटा विद्यालयमा एक जना पनि विद्यार्थी उत्तीर्ण हुन सकेका थिएनन्।

यस वर्षको नतिजाले शैक्षिक सुधारतर्फ सकारात्मक संकेत गरेको देखिए पनि स्थानीय तहमा केही प्रश्नहरू समेत उठेका छन्। प्रश्नपत्र लिक भएको तथा परीक्षा केन्द्रमा कडाइ कमजोर भएको भन्ने गुनासाहरू सार्वजनिक भएका छन्। तर शिक्षा शाखाले ती आरोपहरूलाई निराधार हल्ला मात्र भएको स्पष्ट पारेको छ।

यसैबीच, उत्कृष्ट नतिजा ल्याउने सामुदायिक विद्यालय जनज्योति माध्यमिक विद्यालयका प्रधानाध्यापक अमर बिकले विद्यालयको निरन्तर प्रयास र योजनाबद्ध तयारीका कारण सुधार सम्भव भएको बताए। उनका अनुसार विद्यार्थीलाई विद्यालयमै आवासीय सुविधा सहित अध्ययनको वातावरण तयार गरिएको थियो।

त्यसैगरी, गत वर्ष एक जना पनि विद्यार्थी उत्तीर्ण गराउन नसकेको ओमकार आधारभूत विद्यालयले यस वर्ष उल्लेखनीय सुधार गर्दै करिब ५१ प्रतिशत नतिजा हासिल गरेको छ। विद्यालयले गत वर्षको कमजोर प्रदर्शनपछि नियमित अध्ययन, निगरानी र अतिरिक्त कक्षामार्फत सुधार गरिएको जनाएको छ।

The post दोधारा चाँदनीमा गत वर्षको तुलनामा सुधार, कक्षा ८ नतिजामा उत्साहजनक प्रगति first appeared on Dodhara Chandani khabar.

कञ्चनपुर — कञ्चनपुर निर्वाचन क्षेत्र नं. ३ अन्तर्गत भारतसँग जोडिएको सीमावर्ती क्षेत्रमा आज संयुक्त अनुगमन तथा स्थलगत निरीक्षण गरिएको छ। क्षेत्रीय सांसद ज्ञानेन्द्र महतासहित नेपाल–भारत सीमा सर्वेक्षण टोलीका प्रमुख ज्ञानेन्द्र बिष्ट, प्रमुख जिल्ला अधिकारी मदन कोइराला तथा सशस्त्र प्रहरी उपरीक्षक प्रेम सिग्देलको टोलीले विवाद देखिएका विभिन्न स्थानमा पुगेर अवस्थाको प्रत्यक्ष अवलोकन गरेको हो।

निरीक्षणका क्रममा सीमाक्षेत्रमा देखिएका समस्या, हराएका तथा क्षतिग्रस्त सीमा स्तम्भ (पिल्लर)हरूको अवस्था, स्थानीयले भोगिरहेका समस्या तथा सीमांकनमा देखिएका अस्पष्टताबारे विस्तृत जानकारी संकलन गरिएको टोलीले जनाएको छ। पछिल्लो समय सीमाक्षेत्रमा पिल्लर हराउने, सारिने वा क्षति हुने घटनाले विवाद बढ्दै गएको सन्दर्भमा यस्ता अनुगमनलाई महत्वपूर्ण रूपमा हेरिएको छ।

टोलीले आगामी वैशाखको दोस्रो सातादेखि नेपाल–भारत सीमा सर्वेक्षण कार्यलाई थप तीव्रता दिने तयारी गरेको छ। यसअन्तर्गत हराएका पिल्लर पुनःनिर्माण गर्ने, क्षतिग्रस्त पिल्लर मर्मत गर्ने तथा स्पष्ट रूपमा सीमा एकिन गर्ने काम अघि बढाइने जनाइएको छ।

सांसद ज्ञानेन्द्र महताले सीमासम्बन्धी समस्या दीर्घकालीन रूपमा समाधान गर्न सरकारका सम्बन्धित निकायहरू सक्रिय रूपमा लागिरहेको बताए। उनले स्थानीयवासीको गुनासो र सुझावलाई ध्यानमा राख्दै दुवै देशबीच समन्वय गरेर काम अगाडि बढाइने उल्लेख गरे।

स्थानीय तहमा देखिँदै आएका सीमा विवाद समाधान, भूमि व्यवस्थापनमा स्पष्टता ल्याउने तथा सीमाक्षेत्रमा बसोबास गर्ने नागरिकको सुरक्षामा सुधार ल्याउने लक्ष्यका साथ यो पहल अघि बढाइएको हो। यसले भविष्यमा सीमा सम्बन्धी विवाद न्यूनीकरण गर्न महत्वपूर्ण योगदान पुर्‍याउने अपेक्षा गरिएको छ।

The post सीमा विवाद समाधानतर्फ सक्रियता: कञ्चनपुर–३ मा संयुक्त अनुगमन तीव्र first appeared on Dodhara Chandani khabar.

भुपेन्द्र ओली – सम्पत्ति विवरण सार्वजनिक भएसँगै अहिले यो विषय निकै विवादित बनेको छ। सामाजिक सञ्जालदेखि सर्वसाधारणबीच विभिन्न धारणा र तर्कहरू खुला रूपमा व्यक्त भइरहेका छन्। कतिपयले यसलाई पारदर्शिताको सकारात्मक कदम मानेका छन् भने कतिपयले यसको विश्वसनीयतामै प्रश्न उठाएका छन्।

यही सन्दर्भमा एउटा रोचक तर गम्भीर तर्क पनि सुन्न पाइन्छ सम्पत्ति विवरणमा देखाइएको सम्पत्ति वास्तविकभन्दा बढी पनि हुन सक्छ। केही व्यक्तिहरूको अनुभव अनुसार, जिम्मेवारीपूर्ण पदमा पुगेपछि भविष्यमा सम्पत्ति बढ्ने सम्भावना उच्च हुने भएकाले सुरुमा नै अलि बढी देखाउने ‘सल्लाह’ दिइने गरेको कुरा पनि बाहिर आएको छ। यस्तो सोचले अहिलेको बहसलाई अझ जटिल बनाएको छ।

अर्कोतर्फ, विगतको अनुभव हेर्दा धेरै नेताहरूले आफ्नो सम्पत्ति लुकाउने वा कम देखाउने आरोप खेपेका थिए। त्यसैले अहिलेको विवरणमा देखिएको उच्च सम्पत्ति हेर्दा सर्वसाधारण अचम्ममा पर्नु स्वाभाविक हो। यही कारणले दुईवटा सम्भावना उठाइएका छन्या त वास्तविक सम्पत्ति अझ बढी छ, या त देखाइएको सम्पत्ति वास्तविकभन्दा कम वा बढी हुन सक्छ।

केहीले त अझै अगाडि बढेर, भविष्यमा हुने आम्दानीलाई सहज बनाउन अहिले नै बढी सम्पत्ति देखाइएको हुन सक्ने आशंका पनि व्यक्त गरेका छन्। यदि यस्तो हो भने, यो पारदर्शिताको मर्म विपरीत मात्र होइन, सम्भावित रूपमा कानुनी र नैतिक प्रश्नको विषय पनि बन्न सक्छ।

यथार्थ जे भए पनि, अहिलेको बहसले एउटा स्पष्ट सन्देश दिएको छ सम्पत्ति विवरण सार्वजनिक गर्नु मात्रै पर्याप्त छैन। त्यसको सत्यता परीक्षण, स्रोतको पुष्टि र नियमित अनुगमन आवश्यक छ। अन्यथा, यस्तो विवरणले स्पष्टता दिनुको सट्टा थप शंका र अविश्वास जन्माउने खतरा रहिरहन्छ।

अन्ततः, पारदर्शिता केवल देखाउने प्रक्रियामा होइन, विश्वास स्थापित गर्ने प्रणालीमा निहित हुन्छ। यदि राज्यले त्यस्तो प्रणाली विकास गर्न सकेन भने, हरेक विवरण बहसको विषय त बन्छ, तर विश्वासको आधार बन्न सक्दैन।

The post सुन कि शंका? सम्पत्ति विवरणको बहस first appeared on Dodhara Chandani khabar.

दोधारा चाँदनी — दोधारा चाँदनी नगरपालिका नगर प्रमुख श्री किशोर कुमार लिम्बूको पहलमा, पेसवान संस्थाको समन्वय तथा दातृ निकाय “ल्याटर डे सेन्ट च्यारीटिज (LDSC)” र च्वाइस नेपालको सहयोगमा दोधारा चाँदनी नगर अस्पताललाई USG (अल्ट्रासाउण्ड) मेसिनसहित अत्यावश्यक मेडिकल उपकरण हस्तान्तरण गरिएको छ।

हस्तान्तरण गरिएको अत्याधुनिक USG मेसिनले अस्पतालको सेवा क्षमतामा उल्लेखनीय सुधार ल्याउने विश्वास गरिएको छ। यसअघि पुरानो प्रविधिको मेसिन प्रयोगका कारण रोग पहिचानमा समस्या हुने गरेकोमा अब नयाँ उपकरणले रोग पत्ता लगाउन मात्र नभई उपचार प्रक्रियामा समेत सहजता ल्याउने अपेक्षा गरिएको छ।

“हामीसँग पहिले पुरानो प्रविधिको मेसिन थियो, त्यसैले रोग पत्ता लगाउन गाह्रो हुन्थ्यो। यो अत्याधुनिक अल्ट्रासाउण्ड मेसिन हो, जसले रोग पत्ता लगाउन मात्र नभई उपचारमा पनि सहयोग गर्नेछ,” डाक्टर हरिओम केसीले बताए।

नगर प्रमुख लिम्बूले सहयोगी संस्थाहरू पेसवान, LDSC र च्वाइस नेपालप्रति धन्यवाद व्यक्त गर्दै यस्ता सहयोगले नगरबासीलाई गुणस्तरीय स्वास्थ्य सेवा पहुँचमा सहजता ल्याउने विश्वास व्यक्त गरे।

उक्त उपकरण हस्तान्तरणसँगै अब स्थानीय बासिन्दाले सामान्य जाँचका लागि बाहिर जानुपर्ने बाध्यता घट्ने र समयमै रोग पहिचान तथा उपचारमा सहयोग पुग्ने अपेक्षा गरिएको छ।— दोधारा चाँदनी नगरपालिका नगर प्रमुख श्री किशोर कुमार लिम्बूको पहलमा, पेसवान संस्थाको समन्वय तथा दातृ निकाय “ल्याटर डे सेन्ट च्यारीटिज (LDSC)” र च्वाइस नेपालको सहयोगमा दोधारा चाँदनी नगर अस्पताललाई USG (अल्ट्रासाउण्ड) मेसिनसहित अत्यावश्यक मेडिकल उपकरण हस्तान्तरण गरिएको छ।

हस्तान्तरण गरिएको अत्याधुनिक USG मेसिनले अस्पतालको सेवा क्षमतामा उल्लेखनीय सुधार ल्याउने विश्वास गरिएको छ। यसअघि पुरानो प्रविधिको मेसिन प्रयोगका कारण रोग पहिचानमा समस्या हुने गरेकोमा अब नयाँ उपकरणले रोग पत्ता लगाउन मात्र नभई उपचार प्रक्रियामा समेत सहजता ल्याउने अपेक्षा गरिएको छ।

“हामीसँग पहिले पुरानो प्रविधिको मेसिन थियो, त्यसैले रोग पत्ता लगाउन गाह्रो हुन्थ्यो। यो अत्याधुनिक अल्ट्रासाउण्ड मेसिन हो, जसले रोग पत्ता लगाउन मात्र नभई उपचारमा पनि सहयोग गर्नेछ,” डाक्टर हरिओम केसीले बताए।

नगर प्रमुख लिम्बूले सहयोगी संस्थाहरू पेसवान, LDSC र च्वाइस नेपालप्रति धन्यवाद व्यक्त गर्दै यस्ता सहयोगले नगरबासीलाई गुणस्तरीय स्वास्थ्य सेवा पहुँचमा सहजता ल्याउने विश्वास व्यक्त गरे।

उक्त उपकरण हस्तान्तरणसँगै अब स्थानीय बासिन्दाले सामान्य जाँचका लागि बाहिर जानुपर्ने बाध्यता घट्ने र समयमै रोग पहिचान तथा उपचारमा सहयोग पुग्ने अपेक्षा गरिएको छ।

The post नगरपालिकाको पहलमा स्वास्थ्य क्षेत्रमा महत्वपूर्ण उपलब्धि first appeared on Dodhara Chandani khabar.

दोधारा चाँदनी- दोधारा चाँदनी नगरपालिका–४ स्थित झोलुंगे पुल नजिकको जग्गा तथा वन सम्बन्धी विवादमा विभिन्न पक्षका धारणा सार्वजनिक भइरहेका छन्। एकातर्फ उक्त जमिन कानुनी रूपमा प्राप्त गरिएको दाबी छ भने अर्कोतर्फ सामुदायिक बन अतिक्रमण गरिएको आरोप उठेको छ।

यसअघि मिर्ग बहादुर सिंहले आफ्नो भनाइ सार्वजनिक गरेका थिए भने अहिले उनका छोरा तथा हालका जग्गाधनी पदम सिंहले पनि प्रतिक्रिया दिएका छन्। मिर्ग बहादुर सिंहका अनुसार उनले २०५२ सालमा भूमिआयोगमार्फत उक्त जमिन कानुनी रूपमा आफ्नो नाममा दर्ता गराएका हुन्। उनका अनुसार सो क्षेत्र पहिले चौर (खुला जमिन) थियो र कसैले भोगचलन नगरेको अवस्था थियो।
“हामीले कसैको भोगचलनमा रहेको जमिन आफ्नो नाममा गरेको होइन,” उनले बताएका थिए। साथै, आफ्नो नाममा दर्ता भइसकेपछि जानकारी नदिई त्यहाँ वृक्षारोपण गरिएको दाबी उनले गरेका थिए।

हाल उक्त जग्गा उनका छोरा पदम सिंहको नाममा रहेको छ। पदम सिंहले पनि बुबाको भनाइलाई समर्थन गर्दै उक्त जमिन कानुनी रूपमा आफ्नो परिवारको नाममा रहेको बताएका छन्।
“हाम्रो परिवारले कानुनअनुसार लिएको जग्गा हो, अतिक्रमण गरेको भन्ने कुरा गलत हो,” उनले भने। उनले वडा र नगरपालिकाले पूर्वाग्रही ढंगले निर्णय गरेको आरोपसमेत लगाएका छन्। साथै, आफ्नो नाममा रहेको जग्गा बेचबिखन गर्नु कानुनी अधिकार भएको उनको भनाइ छ।
उनले रुख रोप्दैमा बन हुँदैन पहिले रोपिएको रुख अहिले ठुलो भएर बन जस्तै देखिएको भन्ने तर्कसमेत अघि सारेका छन्। उनले एउटा खुलासा समेत गरे,  संकटकालको समय थियो माओवादीका डरले बृक्षारोपण गर्दा प्रष्ट रूपमा जमिन आफ्नो भएको दाबी गर्न नसकिएको उल्लेख गर्दै अहिलेको विवाद पछि सिर्जना गरिएको दाबी गरेका छन्। साथै, आफूले नियमित रूपमा कर तिर्दै आएको पनि उनले बताएका छन्।

तर वडा नम्बर–४ का वडाध्यक्ष भक्त बहादुर सुनारको भनाइ भने फरक छ। उनका अनुसार यो विवाद नयाँ नभई पहिले नै उठिसकेको विषय हो। वडा कार्यालयले २०८० फागुन १६ गते नै कित्ता नम्बर र क्षेत्रफलसहित ९ वटा कित्ता जग्गा अतिक्रमणमा परेको भन्दै सिफारिस गरिसकेको र यो विवाद उठ्ने बितिकै जिल्ला प्रशासन कार्यालयलाइ समेत सिफारिस गरिएको उनले जानकारी दिए।

दोधारा चाँदनी नगरपालिकाको कार्यपालिकाले पनि झोलुंगे पुल नजिक पश्चिम–उत्तर क्षेत्रमा पार्क निर्माण प्रक्रिया अघि बढाउने निर्णय गरेको छ। साथै, सो क्षेत्रमा पर्ने नर्सरी वनको जग्गा अतिक्रमण गरी व्यक्तिगत नाममा दर्ता गरिएको देखिएकाले उक्त जग्गा नगरपालिका वा नेपाल सरकारको नाममा फिर्ता ल्याउन सम्बन्धित निकायलाई अनुरोध गर्ने निर्णय समेत भइसकेको छ।

यता नगर प्रमुख किशोर लिम्बुले भने करिब २५/२६ वर्षअघि नै लालपुर्जा जारी भइसकेको जग्गाको विषयमा स्थानीय सरकारलाई खारेज गर्ने अधिकार नरहेको स्पष्ट पारेका छन्।

उता स्थानीयवासीहरूको भनाइ भने यसभन्दा फरक छ। उनीहरूका अनुसार उक्त क्षेत्र पहिलेदेखि नै सामुदायिक प्रयोगमा रहेको चौर थियो, जसलाई राजनीतिक पहुँचको आडमा व्यक्तिगत नाममा दर्ता गरिएको हो।
एक स्थानीयका अनुसार, “तत्कालीन समयमा सम्बन्धित परिवारको राजनीतिक पहुँच बलियो थियो र त्यसकै प्रभाव प्रयोग गरेर जमिन आफ्नो नाममा पारिएको हो।”

स्थानीय धवल सिंह धामीले पनि विभिन्न राजनीतिक परिवर्तनसँगै प्रभाव प्रयोग गरिएको आरोप लगाएका छन्। उनका अनुसार पंचायतकालमा कांग्रेस, संकटकालपछि माओवादी र पछि एमालेतर्फ झुकाव देखाउँदै जमिन जोगाउने प्रयास गरिएको थियो। रुख काट्ने प्रयास समेत भएको तर स्थानीयको विरोधका कारण सफल हुन नसकेको उनले बताए। साथै, हिमालय मध्यवर्ती उपभोक्ता समितिमा लामो समय नेतृत्वमा रहनु पनि सोही जग्गासँग जोडिएको विषय भएको उनको दाबी छ।

यस प्रकरणमा एकातर्फ कानुनी रूपमा प्राप्त जग्गा भएको दाबी छ भने अर्कोतर्फ सामुदायिक वन अतिक्रमणको आरोप छ। विभिन्न पक्षबाट आएका फरक फरक धारणा सार्वजनिक भइरहेका बेला यसको अन्तिम निष्कर्ष भने सम्बन्धित निकायको छानबिन र कानुनी प्रक्रियाबाट मात्रै आउने देखिएको छ।

The post रुख रोप्दैमा बन हुँदैन पहिले रोपिएको रुख अहिले ठुलो भएर बन जस्तै देखिए हो :पदम सिंह first appeared on Dodhara Chandani khabar.

डोटी — “स्वास्थ्यका लागि खेलकुद, राष्ट्रका लागि खेलकुद” भन्ने नारासहित सञ्चालन भएको प्रदेश स्तरीय कबड्डी निर्णायक तालिम–२०८२ डोटीमा सम्पन्न भएको छ।
सुदूरपश्चिम प्रदेश खेलकुद परिषद्, धनगढी कैलालीको विशेष सहयोगमा चैत्र २० गतेदेखि २४ गतेसम्म डोटीको बडीकेदार गाउँपालिका–१, बिपिनगरमा तालिम सञ्चालन गरिएको थियो।
अखिल नेपाल कबड्डी संघ, काठमाडौं र सुदूरपश्चिम प्रदेश कबड्डी संघको समन्वय तथा डोटी जिल्ला खेलकुद समिति, सिलगढीको आयोजनामा भएको उक्त तालिममा सुदूरपश्चिम प्रदेशका नौवटै जिल्लाबाट ३० जना सहभागी भएका थिए।
तालिमको उद्घाटन सुदूरपश्चिम प्रदेश कबड्डी संघका अध्यक्ष तथा भीमदत्त नगरपालिका–१० का वडा अध्यक्ष महेश चन्दको प्रमुख आतिथ्यतामा चैत्र २० गते गरिएको थियो। उद्घाटन कार्यक्रममा उनले कबड्डीले देशलाई सबैभन्दा बढी मेडल दिलाउने खेलमध्ये एक भएको उल्लेख गर्दै राजनीतिक चलखेलका कारण यस खेलले उचित स्थान नपाएको टिप्पणी गरे। उनले कबड्डीमा राम्रो भविष्य रहेको बताउँदै खेलमा अनुशासन सबैभन्दा महत्वपूर्ण पक्ष भएको उल्लेख गरे। साथै कबड्डी संघबाट आवश्यक सम्पूर्ण सहयोग रहने प्रतिबद्धता समेत व्यक्त गरे।
विशिष्ट अतिथि तथा अखिल नेपाल कबड्डी संघका महासचिव अरविन्द कुमार झाले कबड्डी खेलमा तालिमप्राप्त निर्णायकको अभावका कारण धेरै समस्या देखिएको बताए। राष्ट्रपति रनिङ शिल्ड प्रतियोगितामा समेत कबड्डी समावेश भइसकेको सन्दर्भमा निर्णायकको भूमिकामा विवाद बढेको उल्लेख गर्दै उनले यस्ता समस्या समाधानका लागि तालिम आवश्यक रहेको बताए।
डोटी जिल्ला खेलकुद समिति अध्यक्ष प्रकाश शाहीले तालिमको सभापतित्व गरेका थिए।
तालिमको समापन सुदूरपश्चिम प्रदेश खेलकुद परिषद्का सदस्य सचिव लोक बहादुर खड्का (रवि) को प्रमुख आतिथ्यतामा गरिएको थियो। समापन कार्यक्रममा उनले खेलकुदको विकासका लागि दक्ष निर्णायक अत्यावश्यक रहेको उल्लेख गर्दै कबड्डी खेलको भविष्य उज्ज्वल रहेको धारणा व्यक्त गरे।
पाँच दिनसम्म सञ्चालन भएको तालिमले प्रदेशमा दक्ष कबड्डी निर्णायक उत्पादन गरी खेलको विकास र विस्तारमा टेवा पुग्ने आयोजकले विश्वास व्यक्त गरेका छन्।

The post डोटिमा प्रदेश स्तरीय कबड्डी निर्णायक तालिम सम्पन्न, दक्ष निर्णायक उत्पादनमा जोड first appeared on Dodhara Chandani khabar.

डोटी — बडिकेदार गाउँपालिका भित्र पर्ने कापडी गाड, ठूली गाड, जोराइली गाड र गडसेरी गाड को तीव्र कटानका कारण यहाँको प्रमुख बजार क्षेत्र नै उच्च जोखिममा परेको छ।
नदी किनारमा रहेका घर तथा पसलहरू क्रमशः भासिँदै गएका छन् भने संरचनामा चिरा देखिन थालेको छ। वर्षायाम नजिकिँदै जाँदा जोखिम झन् बढ्ने त्रासले स्थानीयवासी चिन्तित बनेका छन्।
यो बजार डोटी जिल्लाकै एक महत्वपूर्ण व्यापारिक केन्द्रका रूपमा चिनिन्छ। तर अवस्था गम्भीर बन्दै जाँदासमेत सम्बन्धित निकायबाट कुनै प्रभावकारी पहल नदेखिएको भन्दै स्थानीय आक्रोशित बनेका छन्।
यस विषयमा स्थानीयवासी गणेश बम ले स्पष्ट रूपमा असन्तुष्टि व्यक्त गरेका छन्। “स्थानीय सरकारले त झन् केही गरेकै छैनउ। हरेक वर्ष समस्या दोहोरिन्छ, तर समाधानका लागि कसैले चासो देखाएको छैन,” उनले भने।
उनका अनुसार पानी पर्ने बित्तिकै बाढीको डरले घर छोडेर डाँडातिर भाग्नुपर्ने बाध्यता रहेको छ।
स्थानीयले तत्काल पक्की तटबन्ध निर्माण, नदी नियन्त्रण तथा जोखिममा रहेका बस्तीको संरक्षणका लागि प्रभावकारी कदम चाल्न माग गरेका छन्। समयमै ध्यान नदिए ठूलो क्षति हुन सक्ने चेतावनी समेत उनीहरूले दिएका छन्।

The post गाडहरुको कटानले डोटीको बिपि नगर बजार उच्च जोखिममा first appeared on Dodhara Chandani khabar.

कञ्चनपुर — सशस्त्र प्रहरी बल, नेपाल ले संगठनभित्र उत्कृष्ट कार्यसम्पादन गर्ने अधिकृत तथा जवानलाई “IG APF Commendation” प्रदान गर्दै सम्मानित गरेको छ।
यस क्रममा सशस्त्र प्रहरी बल अन्तर्गत राजस्व भन्सार तथा औद्योगिक तालिम शिक्षालय, टिकापुर कैलाली दरबन्दी भई हाल सिमा सुरक्षा गुल्म देवस्थान, दोधारा चाँदनीमा कार्यरत स.प्र.ना.उ. गजेन्द्र बहादुर चन्द लाई उक्त सम्मान प्रदान गरिएको हो।
चन्दले आफ्नो कार्यकालमा जिम्मेवारीलाई इमान्दारी, व्यावसायिकता र प्रभावकारिताका साथ निर्वाह गर्दै संगठनको लक्ष्य हासिल गर्न महत्वपूर्ण योगदान पुर्‍याएको मूल्यांकनका आधारमा सम्मान गरिएको हो।
उक्त सम्मान सशस्त्र प्रहरी दिवस–२०८२ (रजत महोत्सव) को अवसरमा प्रदान गरिएको हो।
सम्मान पत्र सशस्त्र प्रहरी महानिरीक्षक (IG) राजु अर्याल द्वारा प्रदान गरिएको थियो।

The post उत्कृष्ट कार्यसम्पादनका लागि स.प्र.ना.उ. गजेन्द्र बहादुर चन्द लाई IG APF Commendation, सशस्त्र प्रहरी महानिरीक्षक राजु अर्याल द्वारा सम्मानित first appeared on Dodhara Chandani khabar.

दोधारा चाँदनी, कञ्चनपुर — दोधारा चाँदनी नगरपालिका–४ स्थित झोलुंगे पुल नजिक रहेको सामुदायिक बन व्यक्तिको नाममा दर्ता गरिएको विषयले अहिले थप जटिल रूप लिएको छ। स्थानीय, जनप्रतिनिधि र सम्बन्धित पक्षहरूबीच फरक–फरक दाबी सार्वजनिक भएपछि विवाद झनै चर्किएको छ।

स्थानीयका अनुसार उक्त बन लामो समयदेखि ३५ घरधुरीले सामूहिक रूपमा प्रयोग गर्दै आएको थियो। तर राजनीतिक पहुँच र आर्थिक प्रभावका आधारमा बन व्यक्तिको नाममा पारिएको आरोप लगाइएको छ। साथै, बनको जमिन घडेरीका रूपमा बिक्रीसमेत गरिएको दाबी गरिएको छ।

“आरोप झुटो हो” — मिर्ग बहादुर सिंह

यस विषयमा जग्गाधनी भनिएका मिर्ग बहादुर सिंहले भने आफूमाथि लगाइएको आरोप अस्वीकार गरेका छन्। उनका अनुसार उक्त जमिन पहिले चौर (खाली जमिन) थियो र कसैले भोगचलन नगरेको अवस्था थियो।

“हामीले कसैको भोगचलन गर्दै आएको जमिन आफ्नो नाममा गरेको होइन, न हामीले नै पहिले भोगचलन गरेका थियौं,” उनले भने।
उनका अनुसार आफ्नो नाममा दर्ता भइसकेपछि जानकारी नै नदिई त्यहाँ वृक्षारोपण गरिएको थियो र त्यस समयमा कुनै विवाद नरहेको दाबी गरे।
“अहिले आएर मात्र विवाद गरिँदैछ, ममाथि लगाइएको आरोप सरासर झुटो हो,” उनले स्पष्ट पारे।

वडाध्यक्षको दाबी: “विवाद पहिले नै उठेको थियो”

तर वडा नम्बर–४ का वडाध्यक्ष भक्त बहादुर सुनारको भनाइ भने फरक छ। उनले यो विवाद अहिले मात्र नभई पहिले नै उठिसकेको दाबी गरे।
उनका अनुसार वडा कार्यालयले २०८० फागुन १६ गते नै उक्त जग्गा अतिक्रमण भएको भन्दै कित्ता नम्बर र क्षेत्रफलसहित सिफारिस गरेको थियो। वडाले कुल ९ वटा कित्ता अतिक्रमणमा परेको उल्लेख गरेको बताइएको छ।

नगरपालिकाको निर्णय: “जग्गा फिर्ता ल्याउन पहल”

दोधारा चाँदनी नगरपालिकाको कार्यपालिकाले पनि उक्त क्षेत्रको विषयमा निर्णय गरिसकेको छ।
निर्णय अनुसार झोलुंगे पुल नजिक पश्चिम–उत्तरतर्फ रहेको जग्गामा पार्क निर्माण प्रक्रिया अघि बढाउने तथा सोसँगै जोडिएको नर्सरी वनको जग्गा अतिक्रमण गरी आफ्नो नाममा दर्ता गरिएको देखिएकाले उक्त जग्गा नगरपालिका वा नेपाल सरकारको नाममा फिर्ता ल्याउन सम्बन्धित निकायसँग अनुरोध गर्ने निर्णय गरिएको छ।

नगर प्रमुखको प्रतिक्रिया: “स्थानीय सरकारको अधिकारभन्दा बाहिर”

तर दोधारा चाँदनीका नगर प्रमुख किशोर लिम्बुले भने यस विषयमा फरक धारणा व्यक्त गरेका छन्। उनका अनुसार करिब २५/२६ वर्षअघि नै लालपुर्जा प्राप्त भइसकेको जग्गाको विषयमा स्थानीय सरकारलाई खारेजी गर्ने अधिकार छैन।

“बनिसकेको लालपुर्जा खारेज गर्ने अधिकार स्थानीय सरकारसँग छैन। पटक–पटक नगरपालिकालाई अधिकारभन्दा बाहिरको काम गर्न दबाब दिने र मिडियावाजी गराउने काम भइरहेको छ,” उनले भने।

उनले यस विषयमा सम्बन्धित पक्षहरूलाई कार्यपालिका बैठकमै जानकारी गराइएको र केन्द्र सरकारका तत्कालीन वनमन्त्री शक्ति बस्नेतसमक्ष पनि विषय पुर्‍याइएको भए पनि ‘लालपुर्जा भइसकेको’ कारण देखाएर समाधान हुन नसकेको जानकारी आएको बताए।

स्थानीयको माग: निष्पक्ष छानबिन र न्याय

यता स्थानीयवासीहरूले भने यो विषयलाई गम्भीर रूपमा लिँदै निष्पक्ष छानबिनको माग गरेका छन्। उनीहरूको भनाइमा सामुदायिक बनजस्तो सार्वजनिक सम्पत्ति व्यक्तिको नाममा पारिनु कानुनी र नैतिक दुवै दृष्टिले गम्भीर विषय हो।

विवादमा फरक–फरक धारणा सार्वजनिक भइरहेका बेला अब सम्बन्धित निकायले कसरी छानबिन अघि बढाउँछ भन्ने विषय चासोको केन्द्रमा परेको छ।

The post जमिन चौर थियो, कसैले भोगचलन गरेको थिएन मेरो नाममा आएपछि मात्र विवाद सुरु भयो: मिर्ग बहादुर सिंहको भनाइ first appeared on Dodhara Chandani khabar.