दोधारा चाँदनी । नेपाली सांगीतिक क्षेत्रमा नयाँ सिर्जनाका रूपमा ‘तिम्रै लागि’ बोलको गीतको अफिसियल म्युजिक भिडियो युट्युबमार्फत सार्वजनिक गरिएको छ। डेभिड क्षेत्री (डेभिड द ग्रेट) र भगवती रावतको स्वर रहेको उक्त गीतमा स्वामी प्रकाश अघोरी र मन्नु भट्टको अभिनय देख्न सकिन्छ।

भावनात्मक प्रेमकथामा आधारित गीतले समर्पण, विश्वास र सम्बन्धको गहिरो भावलाई संगीत तथा दृश्य संयोजनमार्फत प्रस्तुत गरेको छ। भिडियोमा समावेश गरिएका दृश्य, कथावस्तु र कलाकारको अभिनयले गीतलाई अझ जीवन्त बनाएको छ।

गीतका गायक तथा सर्जक डेभिड क्षेत्री (डेभिड द ग्रेट) दोधारा चाँदनीकै स्थायी बासिन्दा हुन्। उनी विगत लामो समयदेखि गीत संगीतको क्षेत्रमा सक्रिय रहँदै आएका छन्। गीत सार्वजनिक भएपछि उनले यस गीतको उद्देश्यबारे बताउँदै भने,

“यो गीत केवल संगीतका लागि मात्र होइन, दोधारा चाँदनीका सुन्दर दृश्यहरूलाई क्यामेरामा कैद गरेर बाहिरी दर्शकहरूमाझ चिनाउने उद्देश्यले पनि तयार गरिएको हो।”

उक्त म्युजिक भिडियोको निर्माण पक्ष Aghori Production ले सम्हालेको हो। भिडियोमा दोधारा चाँदनी क्षेत्रका प्राकृतिक र स्थानीय दृश्यहरू समेटिएकाले गीतले स्थान विशेषको पहिचानसमेत बोकेको देखिन्छ।

सार्वजनिक भएको छोटो समयमै गीतले युट्युब तथा सामाजिक सञ्जालमा राम्रो प्रतिक्रिया पाउँदै आएको छ। दर्शक श्रोताले गीतको भाव, अभिनय तथा स्थानीय दृश्यको प्रयोगको खुलेर प्रशंसा गरिरहेका छन्।

स्थानीय कलाकार र स्थानको प्रवर्द्धनमा आधारित यस्ता सिर्जनाले नेपाली गीत–संगीत क्षेत्रमा सकारात्मक योगदान पुग्ने विश्वास गरिएको छ।

The post डेभिड द ग्रेटको ‘तिम्रै’ लागि सार्वजनिक, दर्शकमाझ सकारात्मक प्रतिक्रिया first appeared on Dodhara Chandani khabar.

कञ्चनपुर गायक तथा संगीतकार बादल थापाको नयाँ गीत ‘धुरुरु २ – नभेटिने माया’ सार्वजनिक भएको केही घण्टामै युट्युबमा हजारौँ भ्यू पुगेका छन्। देश–विदेशका दर्शकले गीतका शब्द र थापाको आवाजलाई मन पराएका छन्। सुदूरपश्चिमका दर्शकले उनलाई “प्रदेशको सान” भनेर प्रशंसा गरिरहेका छन्, र भारतबाट समेत समर्थन आएका छन्।

थापा पछिल्ला वर्षमा स्वर, शब्द र संगीत तीनै क्षेत्रमा सक्रिय कलाकारका रूपमा स्थापित हुँदै आएका छन्। ‘धुरुरु’, ‘हेरा यो मुटुमा चिरा परेको छ’ र ‘करिमाई खोटो’ उनका चर्चित गीतमा पर्छन्।

नयाँ गीतमा भावनात्मक कथा, सरल दृश्य र थापाको प्रस्तुतीले दर्शकको ध्यान खिचेको छ। छायांकन सायद श्रेष्ठ, सम्पादन हिमसागर बम र पोस्ट–प्रोडक्सन Brahvim Films तथा NepAus Dance Studioले गरेका छन्।

दर्शक प्रतिक्रियाले गीतले मनोरञ्जनसँगै क्षेत्रीय गर्व पनि बोकेको देखिन्छ। ‘धुरुरु २’ ले थापाको संगीत यात्रामा नयाँ चमक थपेको छ।

The post बादल थापाको ‘धुरुरु २ नभेटिने माया’ सार्वजनिक first appeared on Dodhara Chandani khabar.

कञ्चनपुर — दोधारा चाँदनी स्थित महाकाली नदीमाथि निर्माण गरिएको चार लेनको भव्य पक्की पुल अहिले आन्तरिक तथा बाह्य पर्यटकको प्रमुख गन्तव्य बनेको छ।
सुन्दर संरचना र अनौठो भव्यता बोकेको यो पुलले महाकालीपारिको दोधारा चाँदनी क्षेत्रलाई महेन्द्रनगरसँग जोड्ने महत्वपूर्ण काम मात्र गरेको छैन, यो आफैँमा एक आकर्षक पर्यटकीय स्थल पनि बनेको छ।

📸 यहाँ हेर्नुहोस्, महाकाली नदीमाथिको मनमोहक दृश्य:

पुलसँगै बनेको आठ किलोमिटर लामो ‘भाइरल रोड’ले थप चर्चा कमाएको छ। बिहान सबेरै र साँझ सूर्यास्तको समयमा यहाँ तस्बिर र भिडियो खिच्न आउने युवायुवतीको भिड लाग्ने गर्छ। सामाजिक सञ्जाल, विशेषगरी फेसबुक र टिकटकमार्फत पुलको लोकप्रियता दिनप्रतिदिन बढिरहेको छ।

शुक्लाफाँटा नगरपालिका–१ का मदन राना भन्छन्,

“फेसबुक र टिकटकमा महाकाली पुल देखेपछि आउन निकै मन लागेको थियो, साँझ घुम्न झन् रमाइलो लाग्यो।”

पुलमात्र होइन, यहाँबाट दोधारा चाँदनी झोलुङ्गे पुल र शारदा ब्यारेजको पनि रमणीय दृश्यावलोकन गर्न सकिन्छ। भारतबाट समेत धेरै पर्यटक पुल हेर्न आउने गरेका छन्।

पुल वरपरको क्षेत्रलाई थप आकर्षक बनाउन महाकाली पुल आयोजना कार्यालयले चारवटा पोखरी र पाँच हजार बिरुवा रोप्ने योजना अगाडि सारेको छ। पोखरीमा बोटिङ सुविधा हुने र बीचमा सानो टापु समेत रहने छ, जसले यो क्षेत्रलाई अझै रोमाञ्चक बनाउनेछ।

महाकाली पुल आयोजना इञ्जिनियर किशोरराज पाण्डेय भन्छन्,

“पोखरी र हरियाली बनेपछि यहाँको पर्यटकीय गतिविधि झन् बढ्नेछ। अहिले पनि दैनिक दुई–तीन सय पर्यटक आउने गरेका छन्।”

अब दोधारा चाँदनी क्षेत्र केवल नदी पार गर्ने गन्तव्य होइन, एक सुन्दर यात्राको सम्झना बन्दै गएको छ।
तपाईं कहिले आउनुहुन्छ त महाकाली चार लेन पुल घुम्न?

The post भाइरल बन्दै महाकाली पुल, दोधारा चाँदनीको नयाँ परिचय (फोटोहरु सहित) first appeared on Dodhara Chandani khabar.

दोधारा चाँदनी :
नववर्ष २०८२ को पावन अवसरमा दोधारा चाँदनी नगरपालिका वडा नं. ९ मा एक भव्य विशेष सांस्कृतिक कार्यक्रम आयोजना हुने भएको छ।
कार्यक्रम २०८१ साल चैत ३१ गते साँझ ७ बजेदेखि अम्बिका माध्यमिक विद्यालयको प्राङ्गणमा सञ्चालन गरिनेछ।

सांस्कृतिक चेतना अभिवृद्धि गर्नुका साथै स्थानीय कलाकारहरूलाई प्रोत्साहन गर्ने उद्देश्यले आयोजना हुने यस कार्यक्रममा स्थानीय कलाकारहरूको बहुआयामिक प्रस्तुतीहरू रहनेछन्।
गीत, नृत्य, नाटक लगायतका विविध कार्यक्रमहरू प्रस्तुत गरिने आयोजक समितिले जानकारी दिएको छ।

विशेष कुरा के छ भने, यस कार्यक्रमलाई प्रत्येक वर्ष नववर्षको पूर्वसन्ध्यामा नियमित रूपमा आयोजना गरिँदै आएको छ।
स्थानीय समुदायको उत्साह, सहभागिता र सांस्कृतिक योगदानले यस कार्यक्रमलाई क्षेत्रकै एउटा प्रमुख सांस्कृतिक कार्यक्रमको रूपमा स्थापित गरिदिएको छ।

कार्यक्रमको आयोजनामा कालिका हाट बजार व्यवस्थापन समिति सक्रिय भूमिका निर्वाह गर्दै आएको छ।
समितिले सम्पूर्ण नगरवासी, विद्यार्थी, अभिभावक तथा शुभेच्छुकहरूलाई कार्यक्रममा उपस्थित भई नववर्षको उत्सवलाई थप रंगीन बनाउन हार्दिक आमन्त्रण गरेको छ।

The post दोधारा चाँदनी–९ मा नववर्षको अवसरमा भव्य सांस्कृतिक कार्यक्रम हुँदै first appeared on Dodhara Chandani khabar.

काठमाडौं । फिल्म ‘जनै हराएको बाहुन’ निर्माण घोषणादेखि चर्चामा छ । चैत अन्त्यदेखि छायांकनमा जाने तयारीमा रहेको फिल्ममा अहिले पनि कास्टिङ जारी छ । फिल्मले आमा र छोराबीचको भावनात्मक सम्बन्धको कथा पेश गर्नेछ । विजय बराल, केकी अधिकारी, मिरुना मगर, गौरव पहारी र रेयर राई कलाकारको रुपमा अनुबन्धित छन् । यो लाइनअपमा राष्ट्रिय चलचित्र पुरस्कार विजेता अभिनेता सुशांक मैनाली पनि जोडिएका छन् । मैनालीको यो ९ वर्षपछि फिल्ममा पुनरागमन हुनेछ ।

उनी पछिल्लोपटक फिल्म ‘जंगे’मा देखिएका थिए । त्यसअघि उनले ‘को आफ्नो’, ‘टलकजंग भर्सेस टुल्के’ र ‘साँघुरो’मा अभिनय गरेका छन् । उनी लामो समयदेखि अमेरिकामा बस्दै आएका छन् । सुशांक प्रदर्शन तयारीमा रहेको फिल्म ‘भूठान’का निर्मातामध्येका एक हुन् । फिल्म प्रचारका लागि उनी यतिबेला काठमाडौंमा छन् । सन् २०१४ मा रिलिज भएको ‘साँघुरो’बाट उनले अभिनेता विधामा राष्ट्रिय चलचित्र अवार्ड जिते ।

मैनालीको प्रवेशले निर्माण टोलीलाई थप ऊर्जा मिलेको असोसियट निर्देशक मनीष राउतले बताए । यो फिल्मले गाउँबाट सहर आएको एक सामान्य व्यक्तिले भोग्नुपरेका अनपेक्षित घटना र त्यसले उनको जीवनमा ल्याएको परिवर्तनको कथालाई पेश गर्नेछ । फिल्मलाई हिमाल न्यौपानेले निर्देशन गर्नेछन् । यो फिल्मको प्रदर्शन आगामी तीजको अवसरमा भदौ १० गतेलाई तय गरिएको छ ।

पेपरक्लिप प्रालिले निर्माण गर्न लागेको फिल्मको पटकथा र संवाद भानुभक्त ढकालले लेखेका छन् । छायांकन चैत २५ गतेदेखि ४० दिनको सेड्युल अनुसार पाल्पा र काठमाडौंमा गरिनेछ । लगानीकर्ता आदित्य फिल्म्स रहेका छन् भने नवीन गुरुङले छायांकन गर्नेछन् ।

News Source click here

The post फिल्ममा फर्किए सुशांक, साइन गरे ‘जनै हराएको बाहुन’ first appeared on Dodhara Chandani khabar.