दोधारा चाँदनी नगरपालिका, शिक्षा, युवा तथा खेलकुद शाखाले आधारभूत तह (कक्षा ८) को परीक्षा २०८२ को नतिजा सार्वजनिक गरेको छ। सार्वजनिक विवरणअनुसार सामुदायिक र निजी गरी नगरपालिकाभित्रका २३ विद्यालयबाट १,१३९ जना विद्यार्थी परीक्षामा सहभागी भएका थिए।

तीमध्ये ७५३ जना विद्यार्थी उत्तीर्ण भएका छन् भने समग्र उत्तीर्ण प्रतिशत ६६ रहेको छ। विद्यालयगत नतिजा अनुसार हिमालयन चाँदनी, युनिक सनराइज, नोभाइस तथा सुदूरपश्चिम विद्यालयले शतप्रतिशत नतिजा हासिल गर्दै उत्कृष्ट प्रदर्शन गरेका छन्। विद्यार्थी संख्याका हिसाबले शारदा सरस्वती माध्यमिक विद्यालयमा सबैभन्दा बढी विद्यार्थी सहभागी भएका थिए।

गत वर्षको तुलनामा यस वर्ष नतिजामा उल्लेखनीय सुधार देखिएको शिक्षा शाखाले जनाएको छ। गत वर्ष कुल ९१० विद्यार्थीमध्ये ८६८ जना परीक्षामा सहभागी भएका थिए। तीमध्ये १८५ जना मात्र उत्तीर्ण भएका थिए भने ७२५ जना अनुत्तीर्ण भएका थिए। त्यस अवधिमा ३ वटा विद्यालयमा एक जना पनि विद्यार्थी उत्तीर्ण हुन सकेका थिएनन्।

यस वर्षको नतिजाले शैक्षिक सुधारतर्फ सकारात्मक संकेत गरेको देखिए पनि स्थानीय तहमा केही प्रश्नहरू समेत उठेका छन्। प्रश्नपत्र लिक भएको तथा परीक्षा केन्द्रमा कडाइ कमजोर भएको भन्ने गुनासाहरू सार्वजनिक भएका छन्। तर शिक्षा शाखाले ती आरोपहरूलाई निराधार हल्ला मात्र भएको स्पष्ट पारेको छ।

यसैबीच, उत्कृष्ट नतिजा ल्याउने सामुदायिक विद्यालय जनज्योति माध्यमिक विद्यालयका प्रधानाध्यापक अमर बिकले विद्यालयको निरन्तर प्रयास र योजनाबद्ध तयारीका कारण सुधार सम्भव भएको बताए। उनका अनुसार विद्यार्थीलाई विद्यालयमै आवासीय सुविधा सहित अध्ययनको वातावरण तयार गरिएको थियो।

त्यसैगरी, गत वर्ष एक जना पनि विद्यार्थी उत्तीर्ण गराउन नसकेको ओमकार आधारभूत विद्यालयले यस वर्ष उल्लेखनीय सुधार गर्दै करिब ५१ प्रतिशत नतिजा हासिल गरेको छ। विद्यालयले गत वर्षको कमजोर प्रदर्शनपछि नियमित अध्ययन, निगरानी र अतिरिक्त कक्षामार्फत सुधार गरिएको जनाएको छ।

The post दोधारा चाँदनीमा गत वर्षको तुलनामा सुधार, कक्षा ८ नतिजामा उत्साहजनक प्रगति first appeared on Dodhara Chandani khabar.

कञ्चनपुर — कञ्चनपुर निर्वाचन क्षेत्र नं. ३ अन्तर्गत भारतसँग जोडिएको सीमावर्ती क्षेत्रमा आज संयुक्त अनुगमन तथा स्थलगत निरीक्षण गरिएको छ। क्षेत्रीय सांसद ज्ञानेन्द्र महतासहित नेपाल–भारत सीमा सर्वेक्षण टोलीका प्रमुख ज्ञानेन्द्र बिष्ट, प्रमुख जिल्ला अधिकारी मदन कोइराला तथा सशस्त्र प्रहरी उपरीक्षक प्रेम सिग्देलको टोलीले विवाद देखिएका विभिन्न स्थानमा पुगेर अवस्थाको प्रत्यक्ष अवलोकन गरेको हो।

निरीक्षणका क्रममा सीमाक्षेत्रमा देखिएका समस्या, हराएका तथा क्षतिग्रस्त सीमा स्तम्भ (पिल्लर)हरूको अवस्था, स्थानीयले भोगिरहेका समस्या तथा सीमांकनमा देखिएका अस्पष्टताबारे विस्तृत जानकारी संकलन गरिएको टोलीले जनाएको छ। पछिल्लो समय सीमाक्षेत्रमा पिल्लर हराउने, सारिने वा क्षति हुने घटनाले विवाद बढ्दै गएको सन्दर्भमा यस्ता अनुगमनलाई महत्वपूर्ण रूपमा हेरिएको छ।

टोलीले आगामी वैशाखको दोस्रो सातादेखि नेपाल–भारत सीमा सर्वेक्षण कार्यलाई थप तीव्रता दिने तयारी गरेको छ। यसअन्तर्गत हराएका पिल्लर पुनःनिर्माण गर्ने, क्षतिग्रस्त पिल्लर मर्मत गर्ने तथा स्पष्ट रूपमा सीमा एकिन गर्ने काम अघि बढाइने जनाइएको छ।

सांसद ज्ञानेन्द्र महताले सीमासम्बन्धी समस्या दीर्घकालीन रूपमा समाधान गर्न सरकारका सम्बन्धित निकायहरू सक्रिय रूपमा लागिरहेको बताए। उनले स्थानीयवासीको गुनासो र सुझावलाई ध्यानमा राख्दै दुवै देशबीच समन्वय गरेर काम अगाडि बढाइने उल्लेख गरे।

स्थानीय तहमा देखिँदै आएका सीमा विवाद समाधान, भूमि व्यवस्थापनमा स्पष्टता ल्याउने तथा सीमाक्षेत्रमा बसोबास गर्ने नागरिकको सुरक्षामा सुधार ल्याउने लक्ष्यका साथ यो पहल अघि बढाइएको हो। यसले भविष्यमा सीमा सम्बन्धी विवाद न्यूनीकरण गर्न महत्वपूर्ण योगदान पुर्‍याउने अपेक्षा गरिएको छ।

The post सीमा विवाद समाधानतर्फ सक्रियता: कञ्चनपुर–३ मा संयुक्त अनुगमन तीव्र first appeared on Dodhara Chandani khabar.

दोधारा चाँदनी- दोधारा चाँदनी नगरपालिका–४ स्थित झोलुंगे पुल नजिकको जग्गा तथा वन सम्बन्धी विवादमा विभिन्न पक्षका धारणा सार्वजनिक भइरहेका छन्। एकातर्फ उक्त जमिन कानुनी रूपमा प्राप्त गरिएको दाबी छ भने अर्कोतर्फ सामुदायिक बन अतिक्रमण गरिएको आरोप उठेको छ।

यसअघि मिर्ग बहादुर सिंहले आफ्नो भनाइ सार्वजनिक गरेका थिए भने अहिले उनका छोरा तथा हालका जग्गाधनी पदम सिंहले पनि प्रतिक्रिया दिएका छन्। मिर्ग बहादुर सिंहका अनुसार उनले २०५२ सालमा भूमिआयोगमार्फत उक्त जमिन कानुनी रूपमा आफ्नो नाममा दर्ता गराएका हुन्। उनका अनुसार सो क्षेत्र पहिले चौर (खुला जमिन) थियो र कसैले भोगचलन नगरेको अवस्था थियो।
“हामीले कसैको भोगचलनमा रहेको जमिन आफ्नो नाममा गरेको होइन,” उनले बताएका थिए। साथै, आफ्नो नाममा दर्ता भइसकेपछि जानकारी नदिई त्यहाँ वृक्षारोपण गरिएको दाबी उनले गरेका थिए।

हाल उक्त जग्गा उनका छोरा पदम सिंहको नाममा रहेको छ। पदम सिंहले पनि बुबाको भनाइलाई समर्थन गर्दै उक्त जमिन कानुनी रूपमा आफ्नो परिवारको नाममा रहेको बताएका छन्।
“हाम्रो परिवारले कानुनअनुसार लिएको जग्गा हो, अतिक्रमण गरेको भन्ने कुरा गलत हो,” उनले भने। उनले वडा र नगरपालिकाले पूर्वाग्रही ढंगले निर्णय गरेको आरोपसमेत लगाएका छन्। साथै, आफ्नो नाममा रहेको जग्गा बेचबिखन गर्नु कानुनी अधिकार भएको उनको भनाइ छ।
उनले रुख रोप्दैमा बन हुँदैन पहिले रोपिएको रुख अहिले ठुलो भएर बन जस्तै देखिएको भन्ने तर्कसमेत अघि सारेका छन्। उनले एउटा खुलासा समेत गरे,  संकटकालको समय थियो माओवादीका डरले बृक्षारोपण गर्दा प्रष्ट रूपमा जमिन आफ्नो भएको दाबी गर्न नसकिएको उल्लेख गर्दै अहिलेको विवाद पछि सिर्जना गरिएको दाबी गरेका छन्। साथै, आफूले नियमित रूपमा कर तिर्दै आएको पनि उनले बताएका छन्।

तर वडा नम्बर–४ का वडाध्यक्ष भक्त बहादुर सुनारको भनाइ भने फरक छ। उनका अनुसार यो विवाद नयाँ नभई पहिले नै उठिसकेको विषय हो। वडा कार्यालयले २०८० फागुन १६ गते नै कित्ता नम्बर र क्षेत्रफलसहित ९ वटा कित्ता जग्गा अतिक्रमणमा परेको भन्दै सिफारिस गरिसकेको र यो विवाद उठ्ने बितिकै जिल्ला प्रशासन कार्यालयलाइ समेत सिफारिस गरिएको उनले जानकारी दिए।

दोधारा चाँदनी नगरपालिकाको कार्यपालिकाले पनि झोलुंगे पुल नजिक पश्चिम–उत्तर क्षेत्रमा पार्क निर्माण प्रक्रिया अघि बढाउने निर्णय गरेको छ। साथै, सो क्षेत्रमा पर्ने नर्सरी वनको जग्गा अतिक्रमण गरी व्यक्तिगत नाममा दर्ता गरिएको देखिएकाले उक्त जग्गा नगरपालिका वा नेपाल सरकारको नाममा फिर्ता ल्याउन सम्बन्धित निकायलाई अनुरोध गर्ने निर्णय समेत भइसकेको छ।

यता नगर प्रमुख किशोर लिम्बुले भने करिब २५/२६ वर्षअघि नै लालपुर्जा जारी भइसकेको जग्गाको विषयमा स्थानीय सरकारलाई खारेज गर्ने अधिकार नरहेको स्पष्ट पारेका छन्।

उता स्थानीयवासीहरूको भनाइ भने यसभन्दा फरक छ। उनीहरूका अनुसार उक्त क्षेत्र पहिलेदेखि नै सामुदायिक प्रयोगमा रहेको चौर थियो, जसलाई राजनीतिक पहुँचको आडमा व्यक्तिगत नाममा दर्ता गरिएको हो।
एक स्थानीयका अनुसार, “तत्कालीन समयमा सम्बन्धित परिवारको राजनीतिक पहुँच बलियो थियो र त्यसकै प्रभाव प्रयोग गरेर जमिन आफ्नो नाममा पारिएको हो।”

स्थानीय धवल सिंह धामीले पनि विभिन्न राजनीतिक परिवर्तनसँगै प्रभाव प्रयोग गरिएको आरोप लगाएका छन्। उनका अनुसार पंचायतकालमा कांग्रेस, संकटकालपछि माओवादी र पछि एमालेतर्फ झुकाव देखाउँदै जमिन जोगाउने प्रयास गरिएको थियो। रुख काट्ने प्रयास समेत भएको तर स्थानीयको विरोधका कारण सफल हुन नसकेको उनले बताए। साथै, हिमालय मध्यवर्ती उपभोक्ता समितिमा लामो समय नेतृत्वमा रहनु पनि सोही जग्गासँग जोडिएको विषय भएको उनको दाबी छ।

यस प्रकरणमा एकातर्फ कानुनी रूपमा प्राप्त जग्गा भएको दाबी छ भने अर्कोतर्फ सामुदायिक वन अतिक्रमणको आरोप छ। विभिन्न पक्षबाट आएका फरक फरक धारणा सार्वजनिक भइरहेका बेला यसको अन्तिम निष्कर्ष भने सम्बन्धित निकायको छानबिन र कानुनी प्रक्रियाबाट मात्रै आउने देखिएको छ।

The post रुख रोप्दैमा बन हुँदैन पहिले रोपिएको रुख अहिले ठुलो भएर बन जस्तै देखिए हो :पदम सिंह first appeared on Dodhara Chandani khabar.

डोटी — बडिकेदार गाउँपालिका भित्र पर्ने कापडी गाड, ठूली गाड, जोराइली गाड र गडसेरी गाड को तीव्र कटानका कारण यहाँको प्रमुख बजार क्षेत्र नै उच्च जोखिममा परेको छ।
नदी किनारमा रहेका घर तथा पसलहरू क्रमशः भासिँदै गएका छन् भने संरचनामा चिरा देखिन थालेको छ। वर्षायाम नजिकिँदै जाँदा जोखिम झन् बढ्ने त्रासले स्थानीयवासी चिन्तित बनेका छन्।
यो बजार डोटी जिल्लाकै एक महत्वपूर्ण व्यापारिक केन्द्रका रूपमा चिनिन्छ। तर अवस्था गम्भीर बन्दै जाँदासमेत सम्बन्धित निकायबाट कुनै प्रभावकारी पहल नदेखिएको भन्दै स्थानीय आक्रोशित बनेका छन्।
यस विषयमा स्थानीयवासी गणेश बम ले स्पष्ट रूपमा असन्तुष्टि व्यक्त गरेका छन्। “स्थानीय सरकारले त झन् केही गरेकै छैनउ। हरेक वर्ष समस्या दोहोरिन्छ, तर समाधानका लागि कसैले चासो देखाएको छैन,” उनले भने।
उनका अनुसार पानी पर्ने बित्तिकै बाढीको डरले घर छोडेर डाँडातिर भाग्नुपर्ने बाध्यता रहेको छ।
स्थानीयले तत्काल पक्की तटबन्ध निर्माण, नदी नियन्त्रण तथा जोखिममा रहेका बस्तीको संरक्षणका लागि प्रभावकारी कदम चाल्न माग गरेका छन्। समयमै ध्यान नदिए ठूलो क्षति हुन सक्ने चेतावनी समेत उनीहरूले दिएका छन्।

The post गाडहरुको कटानले डोटीको बिपि नगर बजार उच्च जोखिममा first appeared on Dodhara Chandani khabar.

कञ्चनपुर — सशस्त्र प्रहरी बल, नेपाल ले संगठनभित्र उत्कृष्ट कार्यसम्पादन गर्ने अधिकृत तथा जवानलाई “IG APF Commendation” प्रदान गर्दै सम्मानित गरेको छ।
यस क्रममा सशस्त्र प्रहरी बल अन्तर्गत राजस्व भन्सार तथा औद्योगिक तालिम शिक्षालय, टिकापुर कैलाली दरबन्दी भई हाल सिमा सुरक्षा गुल्म देवस्थान, दोधारा चाँदनीमा कार्यरत स.प्र.ना.उ. गजेन्द्र बहादुर चन्द लाई उक्त सम्मान प्रदान गरिएको हो।
चन्दले आफ्नो कार्यकालमा जिम्मेवारीलाई इमान्दारी, व्यावसायिकता र प्रभावकारिताका साथ निर्वाह गर्दै संगठनको लक्ष्य हासिल गर्न महत्वपूर्ण योगदान पुर्‍याएको मूल्यांकनका आधारमा सम्मान गरिएको हो।
उक्त सम्मान सशस्त्र प्रहरी दिवस–२०८२ (रजत महोत्सव) को अवसरमा प्रदान गरिएको हो।
सम्मान पत्र सशस्त्र प्रहरी महानिरीक्षक (IG) राजु अर्याल द्वारा प्रदान गरिएको थियो।

The post उत्कृष्ट कार्यसम्पादनका लागि स.प्र.ना.उ. गजेन्द्र बहादुर चन्द लाई IG APF Commendation, सशस्त्र प्रहरी महानिरीक्षक राजु अर्याल द्वारा सम्मानित first appeared on Dodhara Chandani khabar.

दोधारा चाँदनी, कञ्चनपुर — दोधारा चाँदनी नगरपालिका–४ स्थित झोलुंगे पुल नजिक रहेको सामुदायिक बन व्यक्तिको नाममा दर्ता गरिएको विषयले अहिले थप जटिल रूप लिएको छ। स्थानीय, जनप्रतिनिधि र सम्बन्धित पक्षहरूबीच फरक–फरक दाबी सार्वजनिक भएपछि विवाद झनै चर्किएको छ।

स्थानीयका अनुसार उक्त बन लामो समयदेखि ३५ घरधुरीले सामूहिक रूपमा प्रयोग गर्दै आएको थियो। तर राजनीतिक पहुँच र आर्थिक प्रभावका आधारमा बन व्यक्तिको नाममा पारिएको आरोप लगाइएको छ। साथै, बनको जमिन घडेरीका रूपमा बिक्रीसमेत गरिएको दाबी गरिएको छ।

“आरोप झुटो हो” — मिर्ग बहादुर सिंह

यस विषयमा जग्गाधनी भनिएका मिर्ग बहादुर सिंहले भने आफूमाथि लगाइएको आरोप अस्वीकार गरेका छन्। उनका अनुसार उक्त जमिन पहिले चौर (खाली जमिन) थियो र कसैले भोगचलन नगरेको अवस्था थियो।

“हामीले कसैको भोगचलन गर्दै आएको जमिन आफ्नो नाममा गरेको होइन, न हामीले नै पहिले भोगचलन गरेका थियौं,” उनले भने।
उनका अनुसार आफ्नो नाममा दर्ता भइसकेपछि जानकारी नै नदिई त्यहाँ वृक्षारोपण गरिएको थियो र त्यस समयमा कुनै विवाद नरहेको दाबी गरे।
“अहिले आएर मात्र विवाद गरिँदैछ, ममाथि लगाइएको आरोप सरासर झुटो हो,” उनले स्पष्ट पारे।

वडाध्यक्षको दाबी: “विवाद पहिले नै उठेको थियो”

तर वडा नम्बर–४ का वडाध्यक्ष भक्त बहादुर सुनारको भनाइ भने फरक छ। उनले यो विवाद अहिले मात्र नभई पहिले नै उठिसकेको दाबी गरे।
उनका अनुसार वडा कार्यालयले २०८० फागुन १६ गते नै उक्त जग्गा अतिक्रमण भएको भन्दै कित्ता नम्बर र क्षेत्रफलसहित सिफारिस गरेको थियो। वडाले कुल ९ वटा कित्ता अतिक्रमणमा परेको उल्लेख गरेको बताइएको छ।

नगरपालिकाको निर्णय: “जग्गा फिर्ता ल्याउन पहल”

दोधारा चाँदनी नगरपालिकाको कार्यपालिकाले पनि उक्त क्षेत्रको विषयमा निर्णय गरिसकेको छ।
निर्णय अनुसार झोलुंगे पुल नजिक पश्चिम–उत्तरतर्फ रहेको जग्गामा पार्क निर्माण प्रक्रिया अघि बढाउने तथा सोसँगै जोडिएको नर्सरी वनको जग्गा अतिक्रमण गरी आफ्नो नाममा दर्ता गरिएको देखिएकाले उक्त जग्गा नगरपालिका वा नेपाल सरकारको नाममा फिर्ता ल्याउन सम्बन्धित निकायसँग अनुरोध गर्ने निर्णय गरिएको छ।

नगर प्रमुखको प्रतिक्रिया: “स्थानीय सरकारको अधिकारभन्दा बाहिर”

तर दोधारा चाँदनीका नगर प्रमुख किशोर लिम्बुले भने यस विषयमा फरक धारणा व्यक्त गरेका छन्। उनका अनुसार करिब २५/२६ वर्षअघि नै लालपुर्जा प्राप्त भइसकेको जग्गाको विषयमा स्थानीय सरकारलाई खारेजी गर्ने अधिकार छैन।

“बनिसकेको लालपुर्जा खारेज गर्ने अधिकार स्थानीय सरकारसँग छैन। पटक–पटक नगरपालिकालाई अधिकारभन्दा बाहिरको काम गर्न दबाब दिने र मिडियावाजी गराउने काम भइरहेको छ,” उनले भने।

उनले यस विषयमा सम्बन्धित पक्षहरूलाई कार्यपालिका बैठकमै जानकारी गराइएको र केन्द्र सरकारका तत्कालीन वनमन्त्री शक्ति बस्नेतसमक्ष पनि विषय पुर्‍याइएको भए पनि ‘लालपुर्जा भइसकेको’ कारण देखाएर समाधान हुन नसकेको जानकारी आएको बताए।

स्थानीयको माग: निष्पक्ष छानबिन र न्याय

यता स्थानीयवासीहरूले भने यो विषयलाई गम्भीर रूपमा लिँदै निष्पक्ष छानबिनको माग गरेका छन्। उनीहरूको भनाइमा सामुदायिक बनजस्तो सार्वजनिक सम्पत्ति व्यक्तिको नाममा पारिनु कानुनी र नैतिक दुवै दृष्टिले गम्भीर विषय हो।

विवादमा फरक–फरक धारणा सार्वजनिक भइरहेका बेला अब सम्बन्धित निकायले कसरी छानबिन अघि बढाउँछ भन्ने विषय चासोको केन्द्रमा परेको छ।

The post जमिन चौर थियो, कसैले भोगचलन गरेको थिएन मेरो नाममा आएपछि मात्र विवाद सुरु भयो: मिर्ग बहादुर सिंहको भनाइ first appeared on Dodhara Chandani khabar.

दोधारा चाँदनी, कञ्चनपुर — बाढी लगायत विभिन्न विपद्का घटनाहरूमा जोखिम मोलेर उद्धार कार्यमा सक्रिय भूमिका निर्वाह गरेका दोधारा चाँदनी नगरपालिका–१० का युवा नरेन्द्र बुढा सम्मानित भएका छन्।
नेपाल सरकार, गृह मन्त्रालय अन्तर्गत सशस्त्र प्रहरी बल नं. ७ बैद्यनाथ वाहिनी मुख्यालय, अत्तरिया कैलालीले बुढालाई प्रशंसा–पत्र प्रदान गर्दै सम्मान गरेको हो। विपद्का घटनाहरूमा खोज तथा उद्धार कार्यमा सक्रिय सहभागिता जनाई मानविय तथा भौतिक क्षति न्यूनिकरणमा महत्वपूर्ण योगदान पुर्‍याएको भन्दै उनलाई कदर गरिएको जनाइएको छ।
दोधारा चाँदनी क्षेत्रमा आएको बाढीका क्रममा बस्तीहरू डुबानमा पर्दा सर्वसाधारणलाई सुरक्षित स्थानमा सार्न बुढाले अग्रपंक्तिमा रहेर काम गरेका थिए। उनले आफ्नो ज्यानको जोखिमसमेत बेवास्ता गर्दै बालबालिका तथा वृद्धवृद्धाको उद्धार गरेका थिए। प्रत्यक्षदर्शीहरूका अनुसार, उनी बाढीले डुबेको बाटो हुँदै बालबालिकालाई काँधमा बोकेर सुरक्षित स्थानसम्म पुर्‍याइरहेका थिए।
उद्धार टोली घटनास्थलमा पुग्नुअघि नै उनले आफ्नो टोल र आसपासका धेरै व्यक्तिहरूलाई सुरक्षित स्थानमा सारिसकेका थिए। उनी स्वयं पनि बाढीबाट प्रभावित भए तापनि व्यक्तिगत समस्याभन्दा माथि उठेर दिनरात नभनी उद्धार कार्यमा खटिएका थिए।
बाढी मात्र नभई आगलागी लगायत अन्य विपद्जन्य घटनाहरूमा समेत उनको सक्रियता उल्लेखनीय रहँदै आएको छ। “जहाँ समस्या, त्यहाँ नरेन्द्र बुढा” भन्ने रूपमा परिचित उनले समुदायमा सेवाभाव र साहसको उदाहरण प्रस्तुत गरेका छन्।
सशस्त्र प्रहरी बलले आफ्नो २५औँ स्थापना दिवस २०८२ को अवसरमा उक्त सम्मान प्रदान गरेको हो। यस सम्मानले बुढाको योगदानलाई औपचारिक मान्यता दिएको मात्र नभई समाजका लागि प्रेरणादायी सन्देशसमेत प्रवाह गरेको छ।

The post विपद्का बीच साहसिक उद्धारमा खटिएका नरेन्द्र बुढा सम्मानित first appeared on Dodhara Chandani khabar.

दोधारा चाँदनी, कञ्चनपुर — दोधारा चाँदनी नगरपालिका–४ स्थित झोलुंगे पुल नजिक रहेको सामुदायिक बन व्यक्तिको नाममा दर्ता गरिएको विषय सार्वजनिक भएको छ। उक्त बन लामो समयदेखि स्थानीय ३५ घरधुरीले सामूहिक रूपमा प्रयोग गर्दै आएको बताइन्छ।

स्थानीय धन सिंह ठगुन्नाका अनुसार बन फिर्ता ल्याउन पटक–पटक प्रयास गरिए पनि सफल हुन सकेको छैन। “हामीले धेरै कोसिस गर्‍यौँ, तर राजनीतिक र पैसाको पावर अगाडि केही लागेन, अहिले त हामी थाकिसकेका छौँ,” उनले बताए। उनका अनुसार बनको जग्गा केवल आफ्नो नाममा राख्ने मात्र नभई घडेरीका रूपमा समेत बिक्री गरिएको आरोप छ।

एक स्थानीय महिलाले आफ्नो परिवारको जमिनसमेत जालझेल गरेर हडपिएको गुनासो गरिन्। “मेरो ससुराको पालादेखिको जमिन आफ्नो नाममा गरियो, अहिले हामीलाई नै जमिन छोड्न धम्की दिइरहेको छ,” उनले भनिन्।

धवल सिंह धामीका अनुसार २०६०/६१ सालतिर बैंकका कर्मचारीहरू उक्त बनको जग्गा अवलोकन गर्न आएपछि मात्रै वास्तविकता बाहिर आएको थियो। “त्यो बेला थाहा भयो कि बनको जग्गा बैंकमा धितो राखिएको रहेछ। हामीले धेरै संघर्ष गर्‍यौँ, तर केही गर्न सकेनौँ,” उनले बताए। अहिले देशमा सुशासनको अपेक्षा बढेको उल्लेख गर्दै उनले अहिले बनेको नयाँ सरकारसँग न्यायको आशा व्यक्त गरेका छन्।

स्थानीयका अनुसार उक्त कार्य हिमालय मध्यवर्ती उपभोक्ता समितिका अध्यक्ष तथा मालिका आधारभूत विद्यालयका शिक्षक पदम सिंहको संलग्नतामा भएको आरोप छ। उनी राजनीतिक रूपमा पनि प्रभावशाली व्यक्तिसँग निकट रहेको दाबी गरिएको छ।

स्थानीयवासीहरूले यो विषयलाई सामान्य विवाद नभई सामुदायिक सम्पत्तिमाथिको गम्भीर अतिक्रमणका रूपमा लिएका छन्। उनीहरूले नगरपालिका, जिल्ला प्रशासन कार्यालय, डिभिजन वन कार्यालय तथा अख्तियार दुरुपयोग अनुसन्धान आयोगलाई तत्काल निष्पक्ष छानबिन गरी सत्यतथ्य सार्वजनिक गर्न र बन फिर्ता गराउन माग गरेका छन्।

स्थानीयको स्पष्ट माग छ
“यो विषय सानो होइन, यसलाई गम्भीरतापूर्वक हेरी दोषीमाथि कडा कारबाही गरियोस्।”

यदि समयमै छानबिन नभए, यसले थप सामाजिक असन्तोष र आन्दोलन निम्त्याउने चेतावनीसमेत स्थानीयले दिएका छन्।

The post बन धितो राखेर कारोबार: दोधारा चाँदनीमा ठूलो खुलासा first appeared on Dodhara Chandani khabar.

दोधारा चाँदनी — स्थानीय स्वास्थ्यकर्मी तथा सामाजिक सरोकारमा सक्रिय डा. गगन चौधरी ले वर्तमान राजनीतिक वातावरणमा देखिएको बढ्दो ध्रुवीकरण, सामाजिक सञ्जालमा फैलिँदो आरोप–प्रत्यारोप र वैचारिक विभाजनप्रति चिन्ता व्यक्त गर्दै सहकार्य र विकासमुखी सोच आवश्यक रहेको बताएका छन्।

उनका अनुसार राजनीतिक दलप्रति आस्था राख्नु लोकतान्त्रिक अधिकार भए पनि देशको समग्र आर्थिक र नैतिक विकासलाई सबैभन्दा माथि राख्नुपर्ने आवश्यकता छ। उनले सामाजिक सञ्जालमा देखिने ‘काला कांग्रेस, काला एमाले, काला माओवादी, काला रास्वपा, काला राप्रपा’ जस्ता अभिव्यक्तिले राजनीतिक बहसलाई विभाजनतर्फ धकेलिरहेको टिप्पणी गरे।

डा. चौधरीका अनुसार देश अहिले बेरोजगारी, महँगी, आर्थिक सुस्तता र युवाको विदेश पलायनजस्ता गम्भीर चुनौतीबाट गुज्रिरहेको अवस्थामा राजनीतिक स्थिरता र साझा दृष्टिकोण अत्यावश्यक भएको छ। तर व्यवहारमा विकासमुखी छलफलभन्दा बढी आरोप–प्रत्यारोप र व्यक्तिगत आक्षेप हाबी भइरहेको उनले बताए।

यसै सन्दर्भमा उनले सामाजिक अभियन्ता तथा नवप्रवर्तनकर्ता महावीर पुन जस्ता व्यक्तित्वहरूको योगदान उदाहरणीय रहेको उल्लेख गर्दै सीमित स्रोतका बाबजुद देशका लागि निरन्तर काम गर्ने यस्ता व्यक्तिहरूबाट पनि त्रुटि हुन सक्ने भए पनि उनीहरूको उद्देश्य राष्ट्रहितमा केन्द्रित रहेको स्पष्ट पारे।

उनका अनुसार लोकतन्त्रमा आलोचना स्वाभाविक भए पनि त्यो तथ्य र मर्यादाभित्र रहनुपर्ने हुन्छ। व्यक्तिगत जीवन र चरित्रमाथि लक्षित आक्रमणले समाजलाई अझ विभाजित बनाउने भएकाले राजनीतिक संस्कार सुधार अपरिहार्य रहेको उनले बताए।

डा. चौधरीले सबै राजनीतिक दल, नागरिक समाज र आम नागरिकबीच सहकार्य आवश्यक रहेको उल्लेख गर्दै आर्थिक विकास, रोजगारी सिर्जना, सुशासन र पारदर्शितालाई साझा एजेन्डा बनाउनुपर्नेमा जोड दिए।

अन्ततः उनले वैचारिक विविधता कमजोरी नभई शक्ति भएको उल्लेख गर्दै देश निर्माणको साझा यात्रामा एकता, सहकार्य र सकारात्मक सोच अपरिहार्य रहेको धारणा राखेका छन्।

The post डा. गगन चौधरीको अपिल: राजनीतिक विभाजन अन्त्य गरी विकास र सहकार्यमा जुट्न आग्रह first appeared on Dodhara Chandani khabar.

भोजराज अवस्थी
दोधारा चाँदनी नगरपालिका–१, चैत १७, २०८२

दोधारा चाँदनी नगरपालिका–१ मा प्रजनन स्वास्थ्य रुग्णता सेवा सम्बन्धी एक दिने अभिमुखीकरण कार्यक्रम सम्पन्न भएको छ। स्थानीय तहमा प्रजनन स्वास्थ्य सेवा प्रभावकारी बनाउने उद्देश्यसहित कार्यक्रम आयोजना गरिएको हो।

सुदूरपश्चिम प्रदेश सरकार, सामाजिक विकास मन्त्रालय अन्तर्गत स्वास्थ्य निर्देशनालय तथा स्वास्थ्य कार्यालय कञ्चनपुरको आयोजनामा सम्पन्न उक्त कार्यक्रममा स्वास्थ्य क्षेत्रसँग सम्बन्धित विभिन्न सरोकारवाला निकायका प्रतिनिधिहरुको उल्लेख्य सहभागिता रहेको थियो।

कार्यक्रममा प्रस्तोताका रूपमा आरति पाण्डेले सहजीकरण गर्दै प्रजनन स्वास्थ्यसँग सम्बन्धित रोगहरूको पहिचान, उपचार प्रक्रिया, सेवा प्रवाहका चुनौती तथा सुधारका उपायहरूबारे विस्तृत जानकारी दिएकी थिइन्। उनले विशेषगरी महिलाको प्रजनन स्वास्थ्य, किशोरीमैत्री सेवा, तथा समयमै रोग पहिचानको महत्त्वबारे जोड दिएकी थिइन्।

कार्यक्रममा दोधारा चाँदनी नगरपालिका–१ का वडाध्यक्ष बिक्रम चन्दको पनि उपस्थिति रहेको थियो। उनले स्थानीय तहबाट स्वास्थ्य सेवा सुदृढीकरणका लागि यस्ता कार्यक्रम आवश्यक रहेको उल्लेख गर्दै समुदायस्तरसम्म प्रभावकारी सेवा विस्तारमा जोड दिनुपर्ने बताए।

अभिमुखीकरण कार्यक्रममा सहभागी स्वास्थ्यकर्मी, महिला स्वास्थ्य स्वयंसेविका तथा अन्य सरोकारवालाहरूले सेवा प्रवाहका क्रममा देखिएका व्यवहारिक समस्या, जनचेतनाको अभाव, तथा स्रोत साधनको सीमितताबारे आफ्ना अनुभवहरू साझा गरेका थिए। साथै, सेवा सुधारका लागि आवश्यक सहकार्य र समन्वयलाई अझ सुदृढ बनाउनुपर्नेमा जोड दिइएको थियो।

कार्यक्रमले प्रजनन स्वास्थ्यसम्बन्धी सचेतना अभिवृद्धि गर्न, सेवाको पहुँच विस्तार गर्न तथा गुणस्तरीय स्वास्थ्य सेवा प्रवाहमा सहयोग पुग्ने विश्वास आयोजक पक्षले व्यक्त गरेको छ।

The post दोधारा चाँदनीमा प्रजनन स्वास्थ्य सेवा सुदृढीकरणका लागि अभिमुखीकरण सम्पन्न first appeared on Dodhara Chandani khabar.