डोटी — “स्वास्थ्यका लागि खेलकुद, राष्ट्रका लागि खेलकुद” भन्ने नारासहित सञ्चालन भएको प्रदेश स्तरीय कबड्डी निर्णायक तालिम–२०८२ डोटीमा सम्पन्न भएको छ।
सुदूरपश्चिम प्रदेश खेलकुद परिषद्, धनगढी कैलालीको विशेष सहयोगमा चैत्र २० गतेदेखि २४ गतेसम्म डोटीको बडीकेदार गाउँपालिका–१, बिपिनगरमा तालिम सञ्चालन गरिएको थियो।
अखिल नेपाल कबड्डी संघ, काठमाडौं र सुदूरपश्चिम प्रदेश कबड्डी संघको समन्वय तथा डोटी जिल्ला खेलकुद समिति, सिलगढीको आयोजनामा भएको उक्त तालिममा सुदूरपश्चिम प्रदेशका नौवटै जिल्लाबाट ३० जना सहभागी भएका थिए।
तालिमको उद्घाटन सुदूरपश्चिम प्रदेश कबड्डी संघका अध्यक्ष तथा भीमदत्त नगरपालिका–१० का वडा अध्यक्ष महेश चन्दको प्रमुख आतिथ्यतामा चैत्र २० गते गरिएको थियो। उद्घाटन कार्यक्रममा उनले कबड्डीले देशलाई सबैभन्दा बढी मेडल दिलाउने खेलमध्ये एक भएको उल्लेख गर्दै राजनीतिक चलखेलका कारण यस खेलले उचित स्थान नपाएको टिप्पणी गरे। उनले कबड्डीमा राम्रो भविष्य रहेको बताउँदै खेलमा अनुशासन सबैभन्दा महत्वपूर्ण पक्ष भएको उल्लेख गरे। साथै कबड्डी संघबाट आवश्यक सम्पूर्ण सहयोग रहने प्रतिबद्धता समेत व्यक्त गरे।
विशिष्ट अतिथि तथा अखिल नेपाल कबड्डी संघका महासचिव अरविन्द कुमार झाले कबड्डी खेलमा तालिमप्राप्त निर्णायकको अभावका कारण धेरै समस्या देखिएको बताए। राष्ट्रपति रनिङ शिल्ड प्रतियोगितामा समेत कबड्डी समावेश भइसकेको सन्दर्भमा निर्णायकको भूमिकामा विवाद बढेको उल्लेख गर्दै उनले यस्ता समस्या समाधानका लागि तालिम आवश्यक रहेको बताए।
डोटी जिल्ला खेलकुद समिति अध्यक्ष प्रकाश शाहीले तालिमको सभापतित्व गरेका थिए।
तालिमको समापन सुदूरपश्चिम प्रदेश खेलकुद परिषद्का सदस्य सचिव लोक बहादुर खड्का (रवि) को प्रमुख आतिथ्यतामा गरिएको थियो। समापन कार्यक्रममा उनले खेलकुदको विकासका लागि दक्ष निर्णायक अत्यावश्यक रहेको उल्लेख गर्दै कबड्डी खेलको भविष्य उज्ज्वल रहेको धारणा व्यक्त गरे।
पाँच दिनसम्म सञ्चालन भएको तालिमले प्रदेशमा दक्ष कबड्डी निर्णायक उत्पादन गरी खेलको विकास र विस्तारमा टेवा पुग्ने आयोजकले विश्वास व्यक्त गरेका छन्।

The post डोटिमा प्रदेश स्तरीय कबड्डी निर्णायक तालिम सम्पन्न, दक्ष निर्णायक उत्पादनमा जोड first appeared on Dodhara Chandani khabar.

दोधारा चाँदनी- कञ्चनपुरको दोधारा चाँदनी मा प्रधानमन्त्री कपका लागि तयारीस्वरूप क्रिकेट क्याम्प सञ्चालन हुने भएको छ। स्थानीय क्रिकेट वातावरण र खेलाडीहरूको सक्रियतालाई मध्यनजर गर्दै यहाँ प्रशिक्षण कार्यक्रम आयोजना गर्न लागिएको हो।

दोधारा चाँदनी को क्रिकेटिङ वातावरणलाई ध्यानमा राख्दै कञ्चनपुर जिल्ला क्रिकेट संघ र सुदूरपश्चिम प्रादेशिक क्रिकेट संघ बीचको समन्वयमा प्रधानमन्त्री कप पुरुष राष्ट्रिय एकदिवसीय क्रिकेट प्रतियोगिता का लागि तयारीस्वरूप पीएम कप क्याम्प सञ्चालन गर्न लागिएको हो।

यसअघि धनगढी स्थित फाप्ला क्रिकेट मैदान मा फागुन १२ देखि २४ गतेसम्म सम्पन्न प्रदेशस्तरीय छनोट प्रतियोगिताबाट खेलाडीहरू छनोट गरिएको थियो। सोही प्रतियोगिताबाट छनोट भएका खेलाडीहरूलाई चैत २ गतेदेखि ५ गतेसम्म दोधारा चाँदनीस्थित खेल मैदानमा बन्द प्रशिक्षण दिइने जनाइएको छ।

प्रशिक्षणपछि छनोट भएका खेलाडीहरूलाई चैत ९ गतेभित्र महेन्द्रनगर मा सम्पर्क गर्न संघले अनुरोध गरेको छ। यस सम्बन्धमा दिनेश बहादुर सिंह (कोअर्डिनेटर) र नरेन्द्रराज भट्ट (छनोट समिति सदस्य) लाई सम्पर्क व्यक्तिका रूपमा तोकिएको छ। सूचना सुदूरपश्चिम प्रादेशिक क्रिकेट संघ का सचिव लक्ष्मण दत्त भट्टले जारी गरेका हुन्।

प्रदेशस्तरको यस्तो प्रशिक्षण तथा खेल गतिविधि दोधारा चाँदनीमा आयोजना हुँदा स्थानीय खेलाडीहरूलाई अनुभव हासिल गर्ने अवसर मिल्ने, खेलकुद पूर्वाधार विकासमा सहयोग पुग्ने तथा युवाहरूमा क्रिकेटप्रति आकर्षण बढ्ने अपेक्षा गरिएको छ। साथै यस्ता कार्यक्रमले क्षेत्रको खेलकुद पहिचानलाई थप बलियो बनाउने विश्वास गरिएको छ।

The post दोधारा चाँदनीमा पीएम कप क्याम्प सञ्चालन, स्थानीय क्रिकेट विकासमा टेवा पुग्ने अपेक्षा first appeared on Dodhara Chandani khabar.

दोधारा चाँदनी,— दोधारा चाँदनी नगरपालिकामा केही समयअघि सम्पन्न Day–Night क्रिकेट प्रतियोगिता मा वार्ड नं. १० का युवा खेलाडीहरूले शानदार प्रदर्शन गर्दै विजयी भएका थिए।

आज आयोजित एक कार्यक्रममा विजयी खेलाडीहरूले आफ्नो जितेको ट्रोफी वार्डलाई हस्तान्तरण गरेका छन्। कार्यक्रममा वार्ड अध्यक्ष चन्द्र बहादुर सिंह, सुरेश गिरी तथा प्रेम कार्की ले खेलाडीहरूलाई सम्मान गरेका थिए।

वार्ड अध्यक्ष सिंहले भने, “खेलकुदले युवालाई अनुशासित र जिम्मेवार बनाउँछ। यस जितले अन्य युवालाई पनि खेलकुदप्रति प्रेरित गर्नेछ।”

प्रतियोगितामा खेलाडीहरूको मेहनत, अनुशासन र टिमवर्कले वार्डको गौरव बढाएको स्थानीयवासीहरूले बताएका छन्।

The post Day–Night क्रिकेट प्रतियोगितामा विजयी खेलाडीले ट्रोफी वार्डलाई हस्तान्तरण first appeared on Dodhara Chandani khabar.

कञ्चनपुर । सुदूरपश्चिमका प्रतिभाशाली क्रिकेटर साजन बिटालु अहिले लुम्बिनी रायडर्स टिमको प्रतिनिधित्व गर्दै खेलिरहेका छन्। सुदूरपश्चिममा जन्मिएर क्रिकेटमा आफ्नो छुट्टै पहिचान बनाउन सफल भएका साजन अहिले लुम्बिनी प्रदेशको फ्रेन्चाइज टोलीबाट खेल्दा पनि सुदूरपश्चिमकै गर्व बनेका छन्।

फ्रेन्चाइज क्रिकेट लिगमा टिमहरू प्रदेश वा सहरको नाममा भए पनि खेलाडीको छनोट भने नीलामी (Auction) वा ड्राफ्ट प्रणालीमार्फत हुन्छ। त्यसैले खेलाडीहरू आफ्नो जन्मथलो अनुसार नभई विभिन्न टोलीमा सामेल हुने गर्छन्। त्यही क्रममा साजनलाई पनि लुम्बिनी रायडर्सले उत्कृष्ट प्रदर्शनका आधारमा टिममा चयन गरेको हो।

लुम्बिनी रायडर्सका लागि खेल्दा साजनले निरन्तर राम्रो प्रदर्शन गर्दै टोलीलाई बलियो बनाउँदै आएका छन्। उनले आफ्नो प्रदर्शनमार्फत सुदूरपश्चिमको क्रिकेट क्षमतालाई देशव्यापी रूपमा चिनाउने अवसर समेत पाएका छन्।

साजनका अनुसार, “टिमको नाम फरक भए पनि म जहाँ खेले पनि मेरो पहिचान सुदूरपश्चिमकै रहन्छ। लुम्बिनी रायडर्सको रंगमा पनि म आफ्नै प्रदेशको प्रतिनिधित्वको भावना राखेर खेलिरहेको छु,” उनले बताए।

सुदूरपश्चिमका खेलप्रेमीहरू पनि साजनको प्रदर्शनमा गर्वित छन् र उनीबाट अझै राम्रो नतिजाको अपेक्षा राखिरहेका छन्।

The post प्रदेश फरक, भावना एउटै साजन बिटालु लुम्बिनी रायडर्सको जर्सीमा सुदूरपश्चिमको प्रतिनिधित्व first appeared on Dodhara Chandani khabar.

दोधारा चाँदनी,दोधारा–चाँदनीका खेलाडीहरूको उत्कृष्ट प्रदर्शनसहित हल्द्वानीमा सम्पन्न दोस्रो इंडो–नेपाल कराँते च्याम्पियनसिप २०२५ सम्पन्न

भारतको हल्द्वानीमा सम्पन्न दोस्रो इंडो–नेपाल कराँते च्याम्पियनसिप २०२५ मा नेपालले उत्कृष्ट प्रदर्शन गर्दै दोस्रो स्थान हासिल गरेको छ।

प्रतियोगितामा सहभागी १० जना नेपाली खेलाडी सबै दोधारा चाँदनी नगरपालिकाका निवासी रहेका थिए। ती खेलाडीहरूले ३ स्वर्ण, ५ रजत र २ कास्य पदक जित्दै नेपालको झण्डा अन्तर्राष्ट्रिय मञ्चमा फहराउन सफल भएका छन्।

नेपाल टोलीको नेतृत्व देव बहादुर थापाले गर्नुभएको थियो। उहाँ विगत लामो समयदेखि दोधारा चाँदनीको खेलकुद र कराँते क्षेत्रमा उल्लेखनीय योगदान दिँदै आउनुभएको छ।

प्रतियोगिताको आयोजना शितोर्यु कराँते फेडेरेशन अफ उत्तराखण्ड, भारतले गरेको थियो, जुन भारत सरकारको युवा तथा खेलकुद मन्त्रालयद्वारा मान्यता प्राप्त संस्था हो।

नेपालका खेलाडीहरूको प्रदर्शनले अन्तर्राष्ट्रिय स्तरमा दोधारा चाँदनी क्षेत्रको प्रतिभा र क्षमताको परिचय दिएको छ।

The post हल्द्वानीमा दोधारा चाँदनीका खेलाडीको उत्कृष्ट प्रदर्शन:इन्डो–नेपाल कराँतेमा नेपाल दोस्रो first appeared on Dodhara Chandani khabar.

कञ्चनपुर, कार्तिक — लुम्बिनी रायडर्सले उत्कृष्ट प्रदर्शन गर्दै पोखरा फाल्कोन्सलाई पराजित गर्दै सेमिफाइनलमा ७ विकेटको शानदार जित दर्ता गरेको छ।

१० ओभरको छोटो फर्म्याटमा खेलेको खेलमा पोखरा फाल्कोन्सले पहिले ब्याटिङ गर्दै १० ओभरमा ७ विकेट गुमाएर ७२ रनको योगफल तयार पारेको थियो। फाल्कोन्सका तर्फबाट सन्दीप जुंग शाहीले २५ बलमा २८ रन र सुनिल दौल्यालले १२ बलमा २२ रन जोडे।

बलिङतर्फ लुम्बिनी रायडर्सका रुपेश कुर्मीले उत्कृष्ट प्रदर्शन गर्दै २ विकेट लिँदै मात्र ४ रन खर्चिए भने सुमित कुमार झा, अहमद हुसेन र दिप नारायण सिंहले पनि १–१ विकेट हात पारे।

७३ रनको लक्ष्य पछ्याउँदै मैदानमा उत्रिएको लुम्बिनी रायडर्सले ७.३ ओभरमै खेल आफ्नो पक्षमा पारेको हो। रायडर्सका राहत हुसेन शेखले १८ बलमा ३५ रनको आक्रामक पारी खेले भने साजन बिटालुले अन्तिम क्षणमा छक्का प्रहार गर्दै टोलीलाई जितसम्म पुर्‍याए। उनले ९ बलमा १९ रनको योगदान दिए।

पोखरा फाल्कोन्सका बलरहरू मध्ये सुनिल दौल्याल र सुरज बोहराले १–१ विकेट लिएका थिए।

अन्तिम ओभरमा साजन बिटालुको विजयी छक्कासँगै लुम्बिनी रायडर्स फाइनलमा प्रवेश गर्न सफल भएको हो।

The post साजन बिटालुको छक्काले लुम्बिनी रायडर्स फाइनलमा first appeared on Dodhara Chandani khabar.

दोधारा चाँदनी, कार्तिक १२।
दोधारा चाँदनी नगर खेलकुद समितिको आयोजनामा यहि कार्तिक २१ गतेदेखि नगर स्तरीय महिला भलिबल प्रतियोगिता सुरु हुने भएको छ। प्रतियोगिता दोधारा चाँदनी–६ स्थित श्री भानु माध्यमिक विद्यालयको खेल मैदानमा सञ्चालन हुनेछ।

आयोजक समितिका अनुसार प्रतियोगितामा नगर भित्रका सबै वडा, विद्यालय, क्याम्पस तथा क्लबहरू सहभागी हुन सक्ने छन्। प्रत्येक टिममा ९ जना खेलाडी र २ जना अफिसियल रहने व्यवस्था गरिएको छ। सहभागी खेलाडीहरू दोधारा चाँदनी नगरपालिकाका स्थायी बासिन्दा हुनुपर्नेछ।

खेलाडीहरूले स्थायी बसोबास प्रमाणपत्र र उमेर खुल्ने प्रमाण संलग्न गरी आफ्नो टिम दर्ता गर्नुपर्नेछ। प्रतियोगिता लिग–नकआउट प्रणाली अनुसार सञ्चालन गरिनेछ।

प्रतियोगिता कार्तिक २१ गते बिहान ११ बजे औपचारिक रूपमा उद्घाटन गरिनेछ। टिम दर्ता गर्नुपर्ने अन्तिम मिति कार्तिक १९ गते दिउँसो ३ बजेभित्र रहेको छ। दर्ता शुल्क रु. ५०० नगरपालिकाको राजस्व फाँटमा बुझाउनुपर्नेछ।

आयोजक समितिले आकर्षक पुरस्कारको व्यवस्था पनि गरेको छ। प्रतियोगिताको प्रथम टिमले रु. ३१,१०० नगद, कप र प्रमाणपत्र पाउनेछ भने द्वितीय टिमले रु. २१,१०० नगद, कप र प्रमाणपत्र प्राप्त गर्नेछ। विजेता र उपविजेता टिमका खेलाडीहरूलाई जनही एक जोडी ट्र्याकसुट प्रदान गरिनेछ। साथै, प्लेयर अफ द टुर्नामेन्टलाई रु. ३,०००, ट्रफी र प्रमाणपत्र तथा उत्कृष्ट खेलाडीहरूलाई जनही रु. १,००० सहित प्रमाणपत्र प्रदान गरिनेछ।

समितिका अनुसार खेल खेल्ने क्रममा चोटपटक वा घाइते भएमा उपचारको जिम्मेवारी स्वयं खेलाडीको हुने व्यवस्था गरिएको छ।

सम्पर्कका लागि उपाध्यक्ष चमन खड्का (९८०६४१२७७४), संयोजक विनोद चौधरी (९८१२७७६३०९) लगायत समितिका सदस्यहरूसँग सम्पर्क गर्न सकिनेछ।

नगर खेलकुद समितिका उपाध्यक्ष खडकाका अनुसार प्रतियोगिताको उद्देश्य नगरका महिलाहरूमा खेलप्रति रुचि, आत्मविश्वास र एकता विकास गर्नु रहेको छ।

The post दोधारा चाँदनीमा नगर स्तरीय महिला भलिबल प्रतियोगिता हुने first appeared on Dodhara Chandani khabar.

दोधारा चाँदनी ।
दोधारा चाँदनी नगरपालिका–८ अन्तर्गत ग्रामीण विकास तथा युवा सशक्तिकरण केन्द्रद्वारा आयोजित टी–१० क्रिकेट प्रतियोगिताको उद्घाटन खेलमा लक्ष्मी इलेक्ट्रिकल्स एन्ड सप्लायर्स टिमले विजयी सुरुवात गरेको छ।

शनिबार सम्पन्न उद्घाटन खेलमा लक्ष्मी इलेक्ट्रिकल्स एन्ड सप्लायर्सले भिमदत्त नगरपालिका–१३ लाई ४८ रनले पराजित गरेको हो।
पहिले ब्याटिङ गरेको लक्ष्मी इलेक्ट्रिकल्स एन्ड सप्लायर्सले निर्धारित १० ओभरमा १२५ रनको लक्ष्य प्रस्तुत गरेको थियो। जवाफी ब्याटिङमा उत्रिएको भिमदत्त–१३ ले ७४ रनमै सबै विकेट गुमाउँदै पराजय ब्यहोर्नु परेको हो।

प्रतियोगिताको उद्घाटन प्रदेशसभा सदस्य बेलबहादुर राना मगरले ब्याटिङ र युवा नेता सन्दीप काजी बस्नेतले बलिङ गरेर गरेका थिए।
उद्घाटन समारोहका बारेमा जानकारी दिँदै युवा सशक्तिकरण केन्द्रका अध्यक्ष हरिशंकर रोकायाले खेलमार्फत युवामा खेलप्रतिको रुचि, अनुशासन र एकताको भावना जागृत हुने बताए।

“राष्ट्रका लागि खेल, स्वास्थ्यका लागि खेल” भन्ने नारासहित सुरु गरिएको प्रतियोगितामा विभिन्न वडाका टिमहरूबीच प्रतिस्पर्धा हुँदैछ।

The post टी–१० क्रिकेट प्रतियोगिताको उद्घाटन खेलमा लक्ष्मी इलेक्ट्रिकल्स एन्ड सप्लायर्स विजयी first appeared on Dodhara Chandani khabar.

दोधारा चाँदनी । दोधारा चाँदनी नगरखेलकुत समितिद्वारा आयोजित “९–ए साइड खुल्ला फुटबल कप २०८२” प्रतियोगिता सोमबार सम्पन्न भएको छ।

“स्वास्थ्यका लागि खेलकुद, राष्ट्रका लागि खेलकुद” भन्ने नाराका साथ दोधारा चाँदनी नगर खेलकुद समितिद्वारा आयोजित नगर स्तरीय पुरुष फुटबल प्रतियोगिता (९–ए साइड खुला फुटबल कप–२०८२) सोमबार सम्पन्न भएको छ।

दीपावली र छठ पर्वको उल्लासमय अवसरमा आयोजना गरिएको उक्त प्रतियोगिता दोधारा चाँदनी नगरपालिका–७ स्थित श्री लक्ष्मी माध्यमिक विद्यालयको प्रांगणमा सम्पन्न भएको हो।
प्रतियोगितामा नगरभित्रका १२ टिमले सहभागिता जनाएका थिए।

अन्तिम खेलमा वडा नं. ८ र वडा नं. ९ बीच रोमाञ्चक प्रतिस्पर्धा भएको थियो। निर्धारित समयमा वडा नं. ८ ले ४ गोल गर्दै विजयी बन्न सफल भयो।

विजेता बनेको वडा नं. ८ टिमले नगद रु. ५५ हजार १००, ट्रफी र प्रमाणपत्र प्राप्त गरेको छ भने उपविजेता वडा नं. ९ ले नगद रु. २५ हजार १००, ट्रफी र प्रमाणपत्र प्राप्त गरेको दोधारा चाँदनी नगर खेलकुद समितिका उपाध्यक्ष चमन खड्काले जानकारी दिए।

कार्यक्रममा नगर प्रमुख किशोर कुमार लिम्बु, वडा नं. ८ र ९ का अध्यक्ष , नगर खेलकुद विकास समितिका पदाधिकारी, तथा खेलप्रेमीहरूको उपस्थिति रहेको थियो।

नगर प्रमुख लिम्बुले कार्यक्रममा बोल्दै खेलकुदले युवामा अनुशासन, आत्मविश्वास र एकताको भावना जगाउने भन्दै यस किसिमका प्रतियोगितालाई निरन्तरता दिने प्रतिबद्धता व्यक्त गरे।

The post दोधारा चाँदनीमा ९–ए साइड खुल्ला फुटबल कप २०८२ प्रतियोगिता सम्पन्न first appeared on Dodhara Chandani khabar.

दोधारा चाँदनी । दिपावलीको उल्लासमय अवसरमा दोधारा चाँदनी नगरपालिकामा आयोजित “७–ए साइड खुल्ला फुटबल कप २०८२” प्रतियोगिता मंगलबार सम्पन्न भएको छ।

प्रतिभा युवा क्लबको आयोजनामा सञ्चालन भएको उक्त प्रतियोगितामा १४ टिमले सहभागिता जनाएका थिए। खेलहरू दोधारा चाँदनी नगरपालिका–९ स्थित अम्बिका माध्यमिक विद्यालयको खेलमैदानमा सम्पन्न भएका थिए।

फाइनल खेल बराल ब्रान्ड एफसी र न्यु तेज सुनचाँदी पसलबीच भएको थियो। निर्धारित समयसम्म दुवै टिमले १–१ गोल गरेपछि खेल पेनाल्टी सुटआउटमा पुगेको थियो। पेनाल्टीमा न्यु तेज सुनचाँदी पसल विजयी बन्न सफल भयो।

विजेता टिमले नगद रु. ५१ हजार १११ सहित ट्रफी र प्रमाणपत्र प्राप्त गर्‍यो भने उपविजेता बराल ब्रान्ड एफसीले नगद रु. २५ हजार ५५५ सहित ट्रफी र प्रमाणपत्र प्राप्त गरेको आयोजक अध्यक्ष सन्दीप काजी बस्नेतले जानकारी दिए।

The post प्रतिभा युवा क्लबद्वारा आयोजित फुटबल प्रतियोगिता सम्पन्न, विजेता न्यु तेज सुनचाँदी पसल first appeared on Dodhara Chandani khabar.