कञ्चनपुर। शुक्लाफाटा राष्ट्रिय निकुञ्ज क्षेत्रअन्तर्गत पर्ने सीमा पिल्लर नम्बर ७९०, लग्गा–बग्गा झिल्मिलातर्फको पिल्लर नम्बर ७९४ र सुन्दरनगर क्षेत्रमा पर्ने पिल्लर नम्बर ७९६ मा सरसफाइ गर्ने पालो भारतको थियो। सीमा पिल्लरको सरसफाइ वा मर्मत गर्दा दुवै देशका सीमा सुरक्षा बलको रहोबर अनिवार्य रहने व्यवस्था भए पनि सुन्दरनगरस्थित पिल्लर नम्बर ७९६ (१७) मा भारतको सीमा सुरक्षा बलले नेपाल पक्षको उपस्थिति बिना एकलौटी रूपमा सरसफाइ गरेपछि विवाद सिर्जना भएको हो।

विवाद उत्पन्न भए लगत्तै विषयलाई समाधान गर्न दुवै देशका सीमा सुरक्षा बलको रहोबरमा पुनः संयुक्त चेकजाँच गरिएको छ। संयुक्त निरीक्षणका क्रममा पिल्लरको अवस्था, स्थान र अभिलेख जाँच गरिएको जनाइएको छ।

सीमा पिल्लरजस्तो संवेदनशील विषयमा द्विपक्षीय सहमति र समन्वय अनिवार्य रहेको स्मरण गराउँदै, भविष्यमा यस्ता कार्य संयुक्त संयन्त्रमार्फत मात्र गर्नुपर्नेमा दुवै पक्षले जोड दिएका छन्।

The post यस्तो थियो सिमा पिल्लर सरसफाइ विवादको वास्तविकता first appeared on Dodhara Chandani khabar.

दोधारा चाँदनी, भारतको मेलाघाट क्षेत्रमा तरकारी खरिदका क्रममा नेपाली र भारतीय व्यापारीबीच विवाद उत्पन्न भएपछि स्थिति केही समयका लागि तनावपूर्ण बनेको थियो। उक्त विवादका क्रममा भारतीय पक्षले नेपाली नागरिकमाथि हातपातसमेत गरेको बताइएको छ।

विवादपछि दुवै पक्षबीच आवागमन रोक्ने प्रयास भइरहेका थिए भने शनिबार उक्त घटनाले उग्र रूप लिँदै भारतीय पक्षले नेपालीहरूलाई भारत प्रवेशमा पूरण प्रतिबन्ध लगाएको थियो।

तर, शनिबार दिउँसो नेपाली र भारतीय सुरक्षा निकाय तथा जनप्रतिनिधिहरूबीचको समन्वयपछि दुवै पक्षबीच सहमति भएर समस्या समाधान गरिएको छ।

नेपालतर्फबाट दोधारा चाँदनी इलाका प्रहरी कार्यालयका प्रमुख प्रहरी निरीक्षक कृष्ण सोनी, तर कञ्चनभोज बीओपीका प्रमुख कृष्ण धामी, दोधारा चाँदनी नगरपालिका–७ का वडाध्यक्ष ज्ञानेन्द्र बाहेक क्षेत्री, सदस्य सन्दीप उपाध्याय र वडा सदस्य भरत नेपालीले दुवै पक्षलाई राखी सहमतिको माध्यमबाट समस्या समाधान गरेका हुन्।

त्यस्तै, भारततर्फबाट उधमसिंहनगर झंकैया थाना प्रमुख देवेन्द्र गौरव तथा भारतीय सीमा सुरक्षा बल (एसएसबी) का प्रतिनिधिहरू उपस्थित थिए।

समाधानपछि प्रहरी निरीक्षक कृष्ण सोनीले भने, “दुवै पक्षको उपस्थिति र सहमतिका साथ समस्या समाधान भएको छ। अब यस्ता गतिविधि दुवै पक्षबाट नदोहरिने गरी सहमति भएको छ।”

त्यसैगरी, झंकैया थाना प्रमुख देवेन्द्र गौरवले भने, “बीचमा समस्या केही जटिल बनेको थियो, तर आज दुवै पक्षका प्रतिनिधिहरू बसेर कुरा गर्दा सहमतिको माध्यमबाट समाधान गरिएको छ।”

The post दोधारा चाँदनी–भारत मेलाघाटमा तरकारी खरिद विवादपछि तनाव, सीमा आवागमन रोकिए पनि सहमतिमा समाधान first appeared on Dodhara Chandani khabar.

इजरायली सेनाले नेपाली विद्यार्थी बिपिन जोशी अब जीवित नरहेको पुष्टि गरेको छ। सन् २०२३ को अक्टोबरमा हमासको आक्रमणपछि जोशी बेपत्ता भएका थिए। उनी इजरायलमा कृषि तालिमका लागि गएका नौ नेपाली विद्यार्थीमध्ये एकमात्र बेपत्ता थिए।

यो खबरसँगै नेपालमा शोकको लहर फैलिएको छ। बिपिनप्रति श्रद्धाञ्जली अर्पण गर्दै सामाजिक सञ्जालमा नेपालीहरूले गहिरो दुःख व्यक्त गरिरहेका छन्।

The post इजरायली सेनाले पुष्टि गर्‍यो बिपिन जोशी अब जीवित छैनन् l first appeared on Dodhara Chandani khabar.

एसीसी यू-१६ इस्ट जोन कप २०२५: नेपालले जित्यो उपाधि, लगातार दोस्रो पटक च्याम्पियन बनेको ऐतिहासिक उपलब्धि! 🏆
कञ्चनपुर , असार २१ –
नेपालको यू–१६ क्रिकेट टोलीले मलेसियामा सम्पन्न एसीसी यू–१६ इस्ट जोन कप २०२५ मा शानदार प्रदर्शन गर्दै लगातार दोस्रो पटक उपाधि जित्न सफल भएको छ। फाइनल खेलमा नेपालले मलेसियालाई ७ विकेटले पराजित गर्दै उपाधि आफ्नो पोल्टोमा पार्‍यो।

टस जितेर पहिला बलिङ रोजेको नेपालले उत्कृष्ट प्रदर्शन गर्दै मलेसियालाई मात्र ९२ रनमा समेटेको थियो। नेपालको तर्फबाट बिपिन शर्माले ४ विकेट लिए भने अन्य बलरहरूले पनि अनुशासित बलिङ गर्दै विपक्षी टोलीलाई दवावमा राख्न सफल भए।
जवाफमा नेपालको सुरुवात सानदार रह्यो। ओपनर राज श्रेष्ठले ३५ रन बनाउँदै जितको आधार तयार गरे। नेपालले लक्ष्य १६ ओभरभित्रै ३ विकेटको क्षतिमा भेट्टायो।
खेलको मुख्य अंशहरू:
स्थान: बायुमास ओभल, मलेसिया
मलेसिया: ९२ रन (३० ओभर)
नेपाल: ९५/३ (१५.४ ओभर)
जित: नेपाल ७ विकेटले विजयी
कप्तान बिपिन शर्माको भनाइ:

“यो जित हामी सबै नेपालीका लागि हो। टिमको मिहिनत, एकता र देशप्रतिको समर्पणले आज हामी यो उपलब्धिमा पुगेका छौँ।”
नेपालले यसअघि सन् २०२३ मा पनि एसीसी यू–१६ इस्ट जोन कपको उपाधि जितेको थियो। यसपटकको जितले नेपाली यु–१६ टोलीको निरन्तर प्रगति र क्रिकेटप्रतिको समर्पणलाई पुनः पुष्टि गरेको छ।
उत्कृष्ट खेलाडीहरू:
बिपिन शर्मा (कप्तान) – उत्कृष्ट बलिङ
राज श्रेष्ठ – उत्कृष्ट सुरुवात
सन्देश अधिकारी – प्रशिक्षकको कुशल नेतृत्व
🇳🇵 नेपाली क्रिकेटको भविष्य उज्यालो
यो जितले नेपाली क्रिकेटमा आशाको नयाँ किरण थपेको छ। नेपाल क्रिकेट सङ्घ (CAN) ले पनि टिमलाई बधाई दिँदै भविष्यमा अझ बलियो तयारी गर्ने प्रतिबद्धता जनाएको छ।
हार्दिक बधाई सम्पूर्ण टिम नेपाललाई – जय नेपाल! 🇳🇵

The post एसीसी यू-१६ इस्ट जोन कप २०२५: नेपालले जित्यो उपाधि, लगातार दोस्रो पटक च्याम्पियन बनेको ऐतिहासिक उपलब्धि! 🏆 first appeared on Dodhara Chandani khabar.

दोधारा चाँदनी –
कञ्चनपुरको दोधारा चाँदनी नगरपालिका–०१, पशुपति टोलमा नेपाली भूमिभित्र निर्माणाधीन घरमा भारतीय सीमा सुरक्षा बल (एसएसबी) ले हस्तक्षेप गरेको छ। लालपुर्जाधारी लक्ष्मण दमाईले कित्ता नं. २९२५ मा सरकारी नक्साअनुसार जग्गा नापजाँच गराई घर निर्माण सुरु गरेका थिए। तर पछिल्ला तीन दिनदेखि भारतीय एसएसबीले “यो सिमानामा पर्छ” भन्दै निर्माण कार्य रोक्न दबाब दिँदै आएको उनको आरोप छ।

“मैले लालपुर्जासहित अमिन ल्याएर घरको जग खनेको हुँ,” दमाईले दोधारा चाँदनी खबरसँग भने, “तर भारतीय एसएसबी बारम्बार आएर उता सार्न भनिरहेको छ। यो नेपाली जमिन हो भन्ने प्रमाण हुँदा पनि दबाब दिनु दुःखद हो।”

स्थानीय परमानन्द भट्टका अनुसार, दमाई मात्र होइन, अन्य सीमावर्ती बासिन्दा पनि वर्षौंदेखि यस्तै समस्यामा छन्।
“२०२३ सालदेखि हामी यही ठाउँमा बस्दै आएका छौं। सीमावर्ती क्षेत्रमा केही बनाउन खोज्दा भारतीय एसएसबी आएर रोकेको धेरैपटक भएको छ,” उनले बताए।

प्रशासन अनविज्ञ, अनुसन्धानका लागि सुरक्षाकर्मी खटाइँदै

घटनाबारे जिल्ला प्रशासन कार्यालय, कञ्चनपुरका प्रमुख जिल्ला अधिकारी लक्ष्मण ढकालले हालसम्म कुनै जानकारी नआएको प्रतिक्रिया दिएका छन्।
“मलाई यस्तो विषयबारे औपचारिक जानकारी आएको छैन। म सशस्त्र प्रहरी र इलाका प्रहरीलाई घटनास्थलमा बुझ्न पठाउँछु,” ढकालले भने।

पत्रकारमाथि पनि रोक: सशस्त्र प्रहरीद्वारा रिपोर्टिङमा अवरोध

घटनाको स्थलगत रिपोर्टिङका लागि पुगेका दोधारा चाँदनी खबरका पत्रकारलाई सशस्त्र प्रहरी बल, नेपाल अन्तर्गत भूमिराज बोर्डर आउट पोस्ट (BOP) का प्रहरी निरीक्षक अमित मल्लले सिमावर्ती क्षेत्रमा रिपोर्टिङ गर्न पूर्वअनुमति लिनु पर्ने भन्दै फोटो तथा भिडियो खिच्न रोक लगाएका छन्।
“सार्वजनिक क्षेत्रमा समाचार संकलन गर्दा पनि रोकिनु प्रेस स्वतन्त्रताको उल्लंघन हो,” पीडित पत्रकारले प्रतिक्रिया दिएका छन्।

स्थानीयको आक्रोश र माग

स्थानीय नागरिकहरू आक्रोशित छन् कि आफ्नो भूमि, लालपुर्जासहित प्रमाण भए पनि भारतीय सुरक्षाकर्मीले हस्तक्षेप गर्नु राष्ट्रिय स्वाभिमानमाथिको चोट हो। उनीहरूले सरकारसँग निम्न माग राखेका छन्:

• सीमामा स्पष्ट चिन्ह (पिलर) स्थापना गरियोस्,
• नागरिकले कानुनी रुपमा पाएका जग्गामा स्वतन्त्रता पूर्वक निर्माण गर्न पाओस्,
• भारतसँग कूटनीतिक तहमा संवाद गरेर यस्ता हस्तक्षेप रोकियोस्।

नेपाल–भारत सीमामा यसअघि लिपुलेक, कालापानी, सुस्ता लगायत ठाउँमा विवाद रहँदै आएको हो। अब शान्त मानिने सुदूरपश्चिमको दोधारा चाँदनी क्षेत्रमा पनि यस्ता विवाद देखिनु चिन्ताजनक संकेत हो। विज्ञहरूका अनुसार सरकारले सीमा सुरक्षालाई मजबुत बनाउँदै स्थानीय नागरिकको हक र स्वतन्त्रता सुनिश्चित गर्नु अत्यावश्यक छ।

The post सिमानाभित्र घर बनाउन खोज्दा भारतीय एसएसबीको हस्तक्षेप, भूमिराज बोर्डर आउट पोस्टका प्रहरी निरीक्षक अमित मल्लद्वारा पत्रकारलाई पनि अवरोध first appeared on Dodhara Chandani khabar.

कञ्चनपुर, दोधारा चाँदनी — भारत–पाकिस्तानबीचको बढ्दो तनावको छायाँ नेपाल–भारत सीमामा पनि देखिन थालेको छ। बुधबार राति दोधारा चाँदनी नगरपालिका–१० का नारायण भण्डारीसहितका नेपाली नागरिकहरू भारतीय सीमा सुरक्षा बल (एसएसबी) को कुटपिटको सिकार बनेका छन्।

भण्डारीसहित स्थानीय नेपालीहरू भारतको सीमावर्ती गाउँ कुतियाकभरमा लागेको जग्गु मेला दर्शन गरेर फर्किने क्रममा एसएसबीले लाठीचार्ज गरेको प्रत्यक्षदर्शीहरू बताउँछन्। भण्डारीले महिलामाथिको दुर्व्यवहारको विरोध गर्दा आफू कुटिएको बताए।

दोधरा चाँदनी खबरलाइ प्राप्त भएको भिडियोमा महिलामाथिको दुर्व्यवहार गरेको र पाकिस्तानलाई सहयोग गरिरहेका छन्” भन्ने आरोप लगाएको प्रस्ट सुन्न सकिन्छ। (तलको भिडियो हेर्नुहोस्।)

(34) महिलामाथिको दुर्व्यवहार गरेको र पाकिस्तानलाई सहयोग गरिरहेका छन्” भन्ने आरोप – YouTube

स्थानीय सुजल जैशीका अनुसार एसएसबीले नेपालीहरूलाई “पाकिस्तानलाई सहयोग गरिरहेका छन्” भन्ने आरोप लगाउँदै दुर्व्यवहार गर्दै आएको छ। “सधैंजस्तै मेला हेर्न गएका थियौं, तर यसपालि फर्कंदा सिमामा भयावह अवस्था देखियो,” उनले भने।

भण्डारीको खुट्टामा लाठीका डामहरू देखिन्छन्, जुन उनीमाथि गरिएको आक्रमणको प्रमाण हो। (तलको फोटो हेर्नुहोस्।)

घटना गम्भीर हुँदाहुँदै पनि हालसम्म न त स्थानीय प्रशासनले यसबारे प्रतिक्रिया दिएको छ, न त दोधारा चाँदनी नगरपालिकाले कुनै पहल अघि बढाएको छ। स्थानीयवासीहरूले सशस्त्र प्रहरी बलसँग सम्पर्क गर्दा उनीहरूले घटनाबारे अनभिज्ञता जनाएका छन्।

“नेपालका नागरिकमाथि यसरी पाकिस्तानको आरोप लगाएर दुर्व्यवहार गर्नु हाम्रो स्वाभिमानमाथिको आक्रमण हो,” भण्डारीले भने। सीमावासीहरू आक्रोशित छन् तर राज्य निकायहरूको मौनता र निष्क्रियताले उनीहरू निराश बनेका छन्।

The post सीमामा तनाव: भारतीय सुरक्षा बलद्वारा नेपालीमाथि कुटपिट, स्थानीय सरकार मौन first appeared on Dodhara Chandani khabar.

काठमाडौं, वैशाख २४ — भारत र पाकिस्तानबीच उत्पन्न तनावपछि त्यसले नेपालमा पार्न सक्ने सम्भावित असरबारे छलफल गर्न गृहमन्त्री रमेश लेखकको अध्यक्षतामा आज गृह मन्त्रालयमा केन्द्रीय सुरक्षा समितिको बैठक बसेको छ।

बैठकले नेपाल–भारत सीमा क्षेत्र, विमानस्थललगायतका संवेदनशील स्थानहरूमा निगरानी बढाउने र सुरक्षा संयन्त्रलाई उच्च सतर्क अवस्थामा राख्ने निर्णय गरेको छ। गृहमन्त्रालयका प्रवक्ता रामचन्द्र तिवारीका अनुसार, मुलुकमा कुनै अवाञ्छित गतिविधि हुन नदिनका लागि आवश्यक सुरक्षात्मक उपायहरू अपनाइनेछ।

भारत–पाक तनावको पृष्ठभूमिमा विकसित घटनाक्रम, त्यसको नेपालमा पार्न सक्ने सम्भावित प्रभाव, र ती देशहरूमा रहेका नेपाली नागरिकको सुरक्षाबारे पनि बैठकमा चर्चा गरिएको प्रवक्ता तिवारीले जानकारी दिए।

“आन्तरिक सुरक्षाका थप तयारी, समन्वय तथा सूचना आदानप्रदानका विषयमा पनि छलफल भएको छ,” उनले भने, “सीमाबाट विमानस्थलसम्मको सुरक्षा संयन्त्रलाई चुस्तदुरुस्त बनाइनेछ।”

The post भारत–पाक तनावपछि नेपालमा सुरक्षा सतर्कता बढाइयो first appeared on Dodhara Chandani khabar.

गत फागुनमा २० वर्षीया नेपाली विद्यार्थी प्रकृति लम्साल होस्टलमा मृत फेला परेकी थिइन्

भारतको ओडिसास्थित कलिंगा इन्स्टिच्यूट अफ इन्डस्ट्रियल टेक्नोलोजी (किट) विश्वविद्यालयमा फेरि अर्की नेपाली विद्यार्थी मृत फेला परेकी छन् ।

उक्त विश्वविद्यालयको स्नातक तह प्रथम वर्षमा अध्ययनरत नेपाली छात्रा वीरगञ्जकी प्रिसा साह बिहीबार साँझ फेला परेकी हुन् । कलेजको होस्टलमा झुण्डिएको अवस्थामा मृत फेला परेको त्यहाँ अध्ययरत् नेपाली विद्यार्थीहरुले बताएका छन् ।

गत ४ फागुनमा सोही विश्वविद्यालयमा अध्ययनरत २० वर्षीया नेपाली विद्यार्थी प्रकृति लम्साल पनि होस्टलमा मृत फेला परेकी थिइन् ।

साह प्रथम वर्षको परीक्षा दिनका लागि विश्वविद्यालयको होस्टेलमै बस्दै आएको बताइएको छ। प्रकृति लम्साल बस्दै आएको होस्टेलमै उनी पनि बस्दै आएकी थिइन्।

उनले के कति कारणले आत्महत्या गरेको भन्ने विषयमा खुलिनसकेको त्यही अध्ययनरत एक नेपाली विद्यार्थीले बताए । साहको शव पोष्टमार्टमका लागि अहिले अस्पतालमा राखिएको छ।

आफूमाथि मानसिक दुर्व्यवहार र ब्ल्याकमेल भएकोबारे उनले दुई पटक कलेज प्रशासनमा उजुरी दिएकी थिइन् । तर, कलेजले गम्भीरतापूर्वक नलिँदा उनले मृत्युको बाटो रोजेकी थिइन् ।

त्यसपछि प्रकृतिको न्याय माग्दै क्याम्पसमा नेपाली विद्यार्थीले गरेको प्रदर्शनमा कलेज प्रशासनले दमन गरेको थियो । कलेज प्रशासनको निर्देशनमा सुरक्षागार्डले नेपाली विद्यार्थीमाथि निर्घात कुटपिट गरेका थिए भने प्रशासनले होस्टल छाडेर जान निर्देशन दिएको थियो । घटना बढ्दै जाँदा तनावको स्थिति पैदा भएको थियो ।

The post किट विश्वविद्यालयमा फेरि अर्की नेपाली विद्यार्थी मृत भेटिइन् first appeared on Dodhara Chandani khabar.

कञ्चनपुर — दोधारा चाँदनी स्थित महाकाली नदीमाथि निर्माण गरिएको चार लेनको भव्य पक्की पुल अहिले आन्तरिक तथा बाह्य पर्यटकको प्रमुख गन्तव्य बनेको छ।
सुन्दर संरचना र अनौठो भव्यता बोकेको यो पुलले महाकालीपारिको दोधारा चाँदनी क्षेत्रलाई महेन्द्रनगरसँग जोड्ने महत्वपूर्ण काम मात्र गरेको छैन, यो आफैँमा एक आकर्षक पर्यटकीय स्थल पनि बनेको छ।

📸 यहाँ हेर्नुहोस्, महाकाली नदीमाथिको मनमोहक दृश्य:

पुलसँगै बनेको आठ किलोमिटर लामो ‘भाइरल रोड’ले थप चर्चा कमाएको छ। बिहान सबेरै र साँझ सूर्यास्तको समयमा यहाँ तस्बिर र भिडियो खिच्न आउने युवायुवतीको भिड लाग्ने गर्छ। सामाजिक सञ्जाल, विशेषगरी फेसबुक र टिकटकमार्फत पुलको लोकप्रियता दिनप्रतिदिन बढिरहेको छ।

शुक्लाफाँटा नगरपालिका–१ का मदन राना भन्छन्,

“फेसबुक र टिकटकमा महाकाली पुल देखेपछि आउन निकै मन लागेको थियो, साँझ घुम्न झन् रमाइलो लाग्यो।”

पुलमात्र होइन, यहाँबाट दोधारा चाँदनी झोलुङ्गे पुल र शारदा ब्यारेजको पनि रमणीय दृश्यावलोकन गर्न सकिन्छ। भारतबाट समेत धेरै पर्यटक पुल हेर्न आउने गरेका छन्।

पुल वरपरको क्षेत्रलाई थप आकर्षक बनाउन महाकाली पुल आयोजना कार्यालयले चारवटा पोखरी र पाँच हजार बिरुवा रोप्ने योजना अगाडि सारेको छ। पोखरीमा बोटिङ सुविधा हुने र बीचमा सानो टापु समेत रहने छ, जसले यो क्षेत्रलाई अझै रोमाञ्चक बनाउनेछ।

महाकाली पुल आयोजना इञ्जिनियर किशोरराज पाण्डेय भन्छन्,

“पोखरी र हरियाली बनेपछि यहाँको पर्यटकीय गतिविधि झन् बढ्नेछ। अहिले पनि दैनिक दुई–तीन सय पर्यटक आउने गरेका छन्।”

अब दोधारा चाँदनी क्षेत्र केवल नदी पार गर्ने गन्तव्य होइन, एक सुन्दर यात्राको सम्झना बन्दै गएको छ।
तपाईं कहिले आउनुहुन्छ त महाकाली चार लेन पुल घुम्न?

The post भाइरल बन्दै महाकाली पुल, दोधारा चाँदनीको नयाँ परिचय (फोटोहरु सहित) first appeared on Dodhara Chandani khabar.

दोधारा चाँदनी, कञ्चनपुर —
सुदूरपश्चिम प्रदेशको पर्यटकीय पहिचान बनेको कञ्चनपुरस्थित दोधारा चाँदनी झोलुङ्गे पुलको प्रवेशद्वारमै अहिलेसम्म पनि पुलको नाम वा विवरण उल्लेख गरिएको बोर्ड राखिएको छैन। एसियाकै दोस्रो लामो झोलुङ्गे पुलको रूपमा परिचित यस पुलले दोधारा चाँदनीलाई अन्तर्राष्ट्रिय स्तरमै चिनाए पनि संरचनागत बेवास्ता र प्रचारप्रसारको कमजोरी देखिएको छ।

आधिकारिक रूपमा “दोधारा चाँदनी झोलुङ्गे पुल” नाम दिइएको यो पुलले कञ्चनपुर जिल्लाको दोधारा र चाँदनी क्षेत्रलाई जोड्दछ। महाकाली नदीमाथि निर्माण गरिएको यो पुलको डिजाइन नेपाली इन्जिनियरले गरेका थिए।
तर, हरेक वर्ष दोधारा चाँदनी नगरपालिकाले पर्यटन प्रवर्द्धनका नाममा लाखौं रुपैयाँ बजेट छुट्याउँदै आएको भए पनि अझैसम्म स्वागतद्वार निर्माण, जानकारीमूलक बोर्ड राख्ने वा फोटो स्पट विकास गर्ने जस्ता आधारभूत संरचनामा समेत ध्यान दिइएको छैन।

स्थानीय बासिन्दा जितु चन्द भन्छन्, “हामीले यहाँ विदेशी पाहुना आउँदा पुल देखाउँछौं, तर गेटमा नाम पनि छैन भनेर लाज मान्नुपर्छ। बजेट कहाँ जान्छ थाहा छैन।” अर्का स्थानीय मन्नु सिंह भन्छन्, “नगरपालिकाले रंगिन कागजमा योजना बनाउँछ, तर वास्तविकतामा केही लागु हुँदैन।”

यता, दोधारा चाँदनी नगरपालिकाका एक कर्मचारी नाम नखुलाउने शर्तमा भन्छन्, “बजेट त छुट्याइन्छ तर योजना कार्यान्वयन र अनुगमनमा कमजोरी भएको हो।”
दोधारा चाँदनीको मुख्य पर्यटकीय गन्तव्य मानिने महाकाली झोलुङ्गे पुलको संरक्षण, प्रवर्द्धन र व्यवस्थापनमा स्थानीय तहले अब गम्भीर ध्यान दिनु पर्ने माग स्थानीयहरूबाट तीव्र रूपमा उठिरहेको छ।

The post दोधारा चाँदनीको गर्व महाकाली झोलुङ्गे पुल, तर गेटमा नामसम्म छैन first appeared on Dodhara Chandani khabar.